विकासदराची जाहीर आकडेवारी संशयास्पद

नाशिक : विकासदर झपाट्याने वाढत असल्याचे सांगितले जात आहे. प्रत्यक्षात वस्तुस्थिती मात्र तशी नाही. विकासदराचे जाहीर केलेले जात असलेले आकडेच संशयास्पद ठरत असून, त्यावर विश्‍वास ठेवून चालणार नाही. नोटाबंदी करण्याच्या निर्णयापेक्षा दुसरा कोणताही निर्णय चुकीचा असूच शकत नाही, असे माजी केंद्रीय अर्थमंत्री यशवंत सिन्हा यांनी सांगितले.

भगवान महावीर जन्मकल्याण सोहळ्यानिमित्त नाशिक येथील प.सा. नाट्यगृहात शुक्रवारी (ता. ३०) आयोजित व्याख्यानमालेत ते बोलत होते. देशहिताच्या गोष्टी लोकांसमोर ठेवण्याच्या सिद्धांतावर चालण्याचे आपण ठरविले असून, कोणाच्या नाराजीच्या वा समाधानाची चिंता करीत नसल्याचे सांगत सिन्हा म्हणाले, की लोकशाही ज्या ज्या वेळी संकटात सापडली, त्या त्या वेळी जनता एकजुटीने लोकशाहीच्या बाजूने उभी राहिली आहे. 

सिन्हा पुढे म्हणाले, की १९९०-९१ मध्ये आपण सहा महिन्यांसाठी अर्थमंत्री होतो, त्या वेळी अर्थव्यवस्था संकटात होती. त्यानंतर चंद्रशेखर यांचे सरकार पडणे, हे आणखी एक संकट देशासमोर होते. मनमोहनसिंग यांच्या कार्यकाळात आर्थिक सुधारणांना वेग आला. १९९८-१९९९ मध्ये आपण पुन्हा अर्थमंत्री झालो तेव्हा आधीच्या तीन वर्षांत विकासदर चार टक्क्यांपर्यंत होता. म्हणजे तेव्हाही आर्थिक संकट कायम होते. पुढे मात्र अटलबिहारी सरकारच्या काळात अर्थव्यवस्थेला गती मिळाली आणि विकासदर आठ टक्क्यांपर्यंत पोचला होता

देशात शेतकरी सर्वांत दुखी आहे. महाराष्ट्रात कित्येक शेतकऱ्यांनी आत्महत्या केल्या आहेत. शेतीमालाला भाव न मिळणे हे प्रमुख कारण त्यामागे आहे. विदर्भाची ओळख शेतकऱ्यांच्या आत्महत्यांची म्हणून होत आहे. बेरोजगारी वाढत आहे. त्याचे कारण म्हणजे नोटाबंदीचा निर्णय आणि जीएसटी असल्याची टीका सिन्हा यांनी केली.