जळगाव बाजार समितीत कांद्याची आवक १००० क्विंटलवर

जळगाव  ः येथील कृषी उत्पन्न बाजार समितीमध्ये या आठवड्यात कांद्याची आवक वाढली असून, दरांवर दबाव आहे. अपेक्षित दर मिळत नसल्याने शेतकरी अडचणीत आले आहेत. बुधवारी (ता. ११) धुळे बाजार समितीत सुमारे ९०० क्विंटल तर जळगाव बाजार समितीमध्ये १००० क्विंटल एवढी आवक झाली.  कांद्याची आवक वाढतच असून, कांदा साठवणुकीची चांगली व्यवस्था ग्रामीण भागात नसल्याने काढणीनंतर कांदा विक्रीशिवाय पर्याय नाही, असे शेतकऱ्यांचे म्हणणे आहे. कांदा चाळी १०० टक्के शेतकऱ्यांकडे किंवा कांदा उत्पादकांकडे नाहीत. दोन-चार गावांमध्ये दोन-तीन शेतकऱ्यांनाच कांदाचाळीचा लाभ मिळाला आहे. जळगाव जिल्ह्यातील अडावद (ता. चोपडा) येथील उपबाजार समितीमध्येही कांद्याची अधिक आवक होत आहे. अडावद बाजारात प्रतिदिन ८०० क्विंटलवर आवक होत असून, ती पुढे आणखी वाढू शकते. 

जळगाव बाजार समितीमध्ये लाल कांद्याला किमान ३०० व कमाल ६०० रुपये प्रतिक्विंटलचा दर बुधवारी होता. तर चाळीसगाव, धुळे, अडावद, शिरपूर येथील बाजार समितीमध्येही कमाल दर ६०० रुपये प्रतिक्विंटलपेक्षा अधिक नाहीत. शिरपूर, चोपडा, रावेर भागातील शेतकऱ्यांना इंदूर (मध्य प्रदेश) येथील बाजार मुंबईच्या तुलनेत जवळ आहे. परंतु इंदूरलाही लाल कांद्याचा कमाल दर ८०० रुपये प्रतिक्विंटलवर नाही. त्यामुळे शेतकरी कांद्याची स्थानिक बाजारातच विक्री करीत आहेत.

यंदा खानदेशात कांद्याची बऱ्यापैकी लागवड झाली होती. धुळे जिल्ह्यातील कापडणे, न्याहळोद, लामकानी, कुसुंबे आदी भागासह शिरपुरातील अर्थे, तऱ्हाडी भागातही चांगली लागवड झाली होती. चोपडा तालुक्‍यातील अडावद, लोणी, पंचक भागात मोठी कांदा लागवड यंदा होती. तर यावलमधील किनगाव, डांभुर्णी, एरंडोलातील कासोदा, आडगाव, उत्राण आदी भागातही कांदा लागवड बऱ्यापैकी झाली होती. चाळीसगाव तालुक्‍यातील पिलखोड व गिरणा काठावर कांदा लागवड अधिक झाली.

कापसाचे पीक काढून कांद्याची लागवड झाली. परंतु कांद्याला अपेक्षित दर नसल्याने शेतकऱ्यांना आर्थिक नुकसान सहन करावे लागत आहे. साक्री (जि. धुळे) तालुक्‍यातील पिंपळनेर बाजार समितीमध्येकी अधिक आवक आहे. कांद्याला दर मात्र अपेक्षित नसल्याने शेतकरी अधिक दरांसाठी १५ ते २० दिवसांच्या उधारीवर कांदा विक्री करू लागले आहेत.