बाजार समितीमधील ई-नाम प्रणालीअंतर्गत व्यवहार ठप्प

बाजार समितीमधील ई-नाम प्रणालीअंतर्गत व्यवहार ठप्प
बाजार समितीमधील ई-नाम प्रणालीअंतर्गत व्यवहार ठप्प

औरंगाबाद : रडत खडत सुरू झालेल्या औरंगाबाद बाजार समितीमधील ई-नाम प्रणालीने शेतमाल खरेदीला लागलेले ग्रहण संपण्याचे नाव घेत नाहीय. ई-नाम प्रणाली सर्वत्र एकत्रित लागू करा या मागणीसाठी बाजार समितीमधील मर्चंट असोसिएशनने ई-नाम प्रणाली विरोधात मंगळवारी (ता. ३) बंद पुकारला. त्यामुळे बाजार समितीमधील ई-नाम प्रणालींतर्गत संपूर्ण व्यवहार ठप्प झाले. 

ई-नाम प्रणाली सर्वत्र एकत्रित लागू करा, अशी मागणी करीत अडत व्यापाऱ्यांनी सोमवारी (ता. २) बाजार समिती समोर धरणे आंदोलन केले. या वेळी ई-नाम प्रणालीविरोधात मंगळवारपासून (ता. ३) बंदची हाक देण्यात आली होती. केंद्र सरकारने ई-नाम प्रणाली लागू करण्याचा निर्णय घेतल्यानंतर पहिल्या टप्प्यातील औरंगाबाद कृषी उत्पन्न बाजार समितीमध्ये १२ मार्चपासून ई-नाम प्रणाली लागू करण्यात आली. तेव्हापासून ई-नाम प्रणालीच्या माध्यमातूनच शेतमालाचा व्यवहार करण्यात आला. 

पहिल्या आठवड्यातील मर्चंट असोसिएशनचा विरोध मावळल्यानंतर सारं काही सुरळीत होऊन ई-नाम प्रणालीचा स्वीकार केला जाईल असे वाटत असतानाच आता या प्रणाली विरोधात पुन्हा मर्चंट असोसिएशनने विरोधाची भूमिका घेतली आहे. ई-नाम प्रणाली बंद करण्याची घोषणा देत बाजार समिती सभापती यांना निवेदन देण्यात आले. बाजार समितीत येणारा माल इतरत्र जात असल्याने बाजार समितीचे नुकसान होत आहे. ही ई-नाम प्रणाली सर्वत्र लागू होईपर्यंत येथेही लागू करू नये, अशी मागणी निवेदनातून करण्यात आली.  

शासनाने बाजार समितीमध्ये ई-नाम प्रणाली लागू केली आहे. त्याची अंमलबजावणी करणे क्रमप्राप्त आहे. व्यापाऱ्यांनी खरेदी प्रक्रियेत असहकार नोंदवून बाजार समितीला कायदेशीर कारवाई करण्यास भाग पाडू नये.  - राधाकिसन पठाडे, सभापती कृषी उत्पन्न बाजार समिती औरंगाबाद.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com