केळीखोड, हिरडा प्रक्रियेसाठी नाबार्डकडून अर्थसाह्य

केळीखोड
केळीखोड

पुणे : राज्यात केळीखोड आणि हिरड्यावर प्रक्रिया करून शेतकऱ्यांना उत्पन्नाचे नवे साधन तयार होण्यासाठी नाबार्डकडून अर्थसाह्य देण्यात येत असल्याची माहिती सूत्रांनी दिली.

सहकारी तत्त्वाने शेतकऱ्यांच्या गटांकडून सुरू करण्यात येत असलेल्या उपक्रमांना नाबार्डकडून कर्जरूपाने अर्थसाह्य केले जाते. पुणे जिल्ह्यातील जुन्नर भागात हिरड्यापासून औद्योगिक वापराचा द्रवरूप उत्पादन तयार करण्यासाठी ४ कोटी ३७ लाख रुपयांचा प्रकल्प मंजूर करण्यात आला आहे. त्यासाठी पणन मंडळाकडून एक कोटी २१ लाख रुपये अर्थसाह्य मिळाले आहे.

हिरडा प्रक्रिया प्रकल्पासाठी नाबार्डकडून १ कोटी ६९ लाख रुपये कर्ज दिले जाणार आहे. याशिवाय खेळत्या भांडवलासाठीदेखील ४९ लाख रुपये नाबार्ड देणार आहे; तसेच ८० लाख रुपये स्वतः संस्थेने या प्रकल्पात गुंतविले आहेत. ''बाराशे आदिवासी शेतकऱ्यांना सोबत घेत हिरड्यापासून प्रक्रिया पदार्थ तयार करण्यासाठी कुकडेश्वर हिरडा आदिवासी प्रक्रिया सहकारी सोसायटी स्थापन करण्यात आली आहे.

या सोसायटीला आतापर्यंत ८५ लाख रुपये देण्यात आले आहे. प्रकल्पाचे काम युद्धपातळीवर सुरू असून, सोसायटीचे उत्पादन अद्याप बाजारात आलेले नसल्याचे सूत्रांनी स्पष्ट केले.

खानदेशातील ताप्ती व्हॅली बनाना प्रक्रिया उत्पादन सहकारी सोसायटीने मात्र केळीखोडापासून तयार केलेले सेंद्रिय वाढ वृद्धिकारक बाजारात उतरविण्यात यश मिळवले आहे. नाबार्डकडून १५३ लाख रुपये ताप्तीसाठी मंजूर झाले असून त्यातील ६५ लाख रुपये सोसायटीला देण्यात आलेले आहेत.

''ताप्ती सोसायटीमध्ये दोनशे शेतकरी सहभागी झाले असून, केळीखोडापासून धागे तयार करण्याचा मुख्य उद्देश या प्रकल्पाचा आहे. त्यासाठी विविध गावांमध्ये २० छोटे युनिट मंजूर करण्यात आले आहेत. त्यापैकी दहा युनिट सुरू झाल्याचे सूत्रांचे म्हणणे आहे.

खानदेशात दरवर्षाला ३८ लाख टन केळीखोड तयार होत असून केळी काढून खोड फेकून दिले जाते किंवा जाळले जाते. केळीखोडावर प्रक्रिया करून धागे, सेंद्रिय खते, जैविक वाढवृध्दीकारके व इतर उत्पादने तयार करण्याचा संकल्प शेतकऱ्यांच्या सोसायटीने केला आहे. या प्रकल्पाला २ कोटी ४७ लाख रुपये राज्य शासनाने मंजूर केलेले आहेत.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com