पीकविमा परताव्यासाठी शिवसेनेचे चक्काजाम

परभणी )ः पंतप्रधान पीक विमा योजनेअंतर्गंत सहभागी झालेल्या सर्व शेतकऱ्यांना खरीप पिकांच्या नुकसानीबद्दल विमा परतावा मंजूर करण्यात यावा. विमा कंपनीच्या बोगस कारभाराची चौकशी करावी. बोंड अळीमुळे तसेच गारपिटीमुळे झालेल्या नुकसानीचे अनुदान शेतकऱ्यांना तत्काळ देण्यात यावे आदी मागण्यांसह जिल्हा प्रशासन तसेच कृषी अधिकाऱ्यांच्या ढिसाळ कारभाराविरोधात शनिवारी (ता. ५) शिवसेनेतर्फे परभणी जिल्ह्यात अनेक ठिकाणी चक्काजाम आंदोलन करण्यात आले.

परभणी तालुक्यात परभणी-पाथरी राष्ट्रीय महामार्गावर पेडगांव येथे परभणी-गंगाखेड रस्त्यावरील ब्राम्हणगांव येथे खासदार संजय जाधव, जिल्हाप्रमुख डाॅ. संजय कच्छवे, रवींद्र पतंगे यांच्या उपस्थितीमध्ये चक्काजाम आंदोलनात शेतकरी, कार्यकर्ते मोठ्या संख्येने सहभागी झाले होते. पूर्णा तालुक्यात परभणी-वसमत राष्ट्रीय महामार्गावर झिरो फाटा येथे जिल्हाप्रमुख विशाल कदम यांच्या प्रमुख उपस्थितीमध्ये, गंगाखेड तालुक्यात गंगाखेड-लोहा रस्त्यावर, गंगाखेड, पालम येथे संतोष मुरकुटे यांच्या उपस्थितीत येथे चक्का जाम आंदोलन करण्यात आले.