शहाद्यात 'स्वाभिमानी'च्या बंदला हिंसक वळण

नंदुरबार  ः शहादा येथे स्वाभिमानी शेतकरी संघटनेने शेतीमालास हमीभाव मिळावा व इतर मागण्यांसाठी पुकारलेल्या बंदला सोमवारी (ता. ९) हिंसक वळण लागले. यात पोलिसांनी भाजीबाजारातील व्यवहार बंद करण्यासाठी गेलेल्या कार्यकर्त्यांवर लाठीमार केला. यात काही कार्यकर्ते जखमी झाले आहेत. 

शहादा येथे शनिवारी (ता. ७) स्वाभिमानी शेतकरी संघटनेचे जिल्हाध्यक्ष धनश्याम चौधरी व सचिन पाटील यांनी हरभरा व इतर शेतीमालास हमीभाव मिळावा, यासाठी तहसील कार्यालयासमोर उपोषण सुरू केले. सोमवारी (ता. ९) या उपोषणाचा तिसरा दिवस होता. सोमवारी संघटनेने शहादा बंदची हाक दिली होती. यामुळे शहादा बाजार समितीमधील लिलाव बंद होते. 

सकाळी कार्यकर्त्यांनी दुचाकी रॅली व मोर्चा काढला. यातच पोलिस स्टेशनजवळील भाजीबाजार सुरू असल्याची माहिती कार्यकर्त्यांना मिळाली. कार्यकर्ते भाजीबाजार बंद करीत असताना पोलिसांनी त्यांना रोखले. या वेळी स्वाभिमानीचे कार्यकर्ते आणि पोलिस यांच्यात वाद झाला. तणाव वाढल्याने दगडफेकही झाली. या वेळी पोलिसांनी लाठीमारही केला. यात काही कार्यकर्ते जखमी झाले. स्थिती नियंत्रणात राहावी यासाठी धनश्याम चौधरी व सचिन पाटील यांना पोलिसांनी ताब्यात घेतले.