लाळ्या खुरकूत प्रकरणाची अधिवेशनापूर्वी चौकशी पूर्ण करा

मुंबई : राज्यातील दोन कोटी गाई-म्हशी व शेळ्या-मेढ्यांना आवश्यक असलेली लाळ्या-खुरकूत आजारावरची लस खरेदीप्रक्रिया रखडवल्याप्रकरणी हिवाळी अधिवेशनात मुख्यमंत्र्यांनी चौकशीचे आदेश देऊनही चौकशी झाली नसल्याचा धक्कादायक खुलासा पशुसंवर्धन राज्यमंत्री अर्जुन खोतकर यांनी गुरुवारी (ता. ८) विधान परिषदेत केला. त्यावर अधिवेशन संपण्याच्या आत या प्रकरणाची चौकशी करण्याचे निर्देश सभापती रामराजे निंबाळकर यांनी दिले.

विरोधी पक्षनेते धनंजय मुंडे यांनी पशुसंवर्धनमंत्री महादेव जानकर व राज्यमंत्री अर्जुन खोतकर यांना फैलावर धरत निविदाप्रक्रियेत घोळ घालून लस खरेदीला उशीर करणाऱ्यांविरोधात कारवाई करण्याची मागणी केली. तसेच, इंडियन इम्युनॉलॉजी या कंपनीकडून २०१६ मध्ये वाढीव दराने लस विक्री केल्याबद्दल ९० लाखांचा दंड आकारला होता. तोच न्याय सातव्या निविदेमध्ये मंजूर केलेल्या बॉयोवेट प्रा. लि. या कंपनीला लावणार का, असा प्रश्न उपस्थित केला. 

दोन दिवसांपूर्वीच विधानसभेमध्ये लाळ्या-खुरकूत आजाराच्या लसीवरून पशुसंवर्धनमंत्र्यांना माफी मागावी लागली होती. तीच नामुष्की गुरुवारी (ता. ८) त्यांच्यावर धनंजय मुंडे यांनी उपस्थित केलेल्या प्रश्नाला उत्तर देताना विधान परिषदेत ओढवली. 

२०१७ मध्ये या लशीच्या खरेदीसाठी तब्बल चार वेळा निविदा काढण्यात आल्या. चौथ्यांदा काढलेल्या निविदेत इंडियन इम्युनॉलॉजी प्रथम पात्र ठरल्यानंतर त्यांना काम देण्याचे निश्चित करण्यात आले. मात्र त्यांनी अन्य राज्यांत महाराष्ट्रापेक्षा कमी किमतीला निविदा भरल्याचे उघड झाल्यानंतर त्यांच्यावर दंडात्मक कारवाई करून पाचव्यांना निविदा काढण्यात आली. या निविदेत बॉयोवेट कंपनीला काम देण्याचे ठरले होते. मात्र, बॉयोवेट कंपनीने हरयानाला ज्या दरात लस विकली, त्यापेक्षा जास्त दराने महाराष्ट्राला लस विकणार असल्याचा आरोप धनंजय मुंडे यांनी केला.