शेतकऱ्यांच्या प्रश्‍नांकडे आमच्याकडून दुर्लक्षच

संग्रहित छायाचित्र
संग्रहित छायाचित्र

नगर  ः ‘महाराष्ट्र नवनिर्माण सेनेने कायमच शेतकऱ्यांच्या प्रत्येक आंदोलनाला पाठिंबा दिला आहे. एवढेच नव्हे, तर त्यात सहभागही घेतला आहे. असे असले, तरी आमच्या पक्षाकडून शेतकऱ्यांच्या प्रश्‍नांकडे दुर्लक्षच झाले, अशी कबुलीही मनसेचे नेते बाळा नांदगावकर यांनी येथे दिली. 

‘मोदीमुक्त भारत’साठी देशातील सर्व पक्षांना एकत्र येण्याचे आवाहन महाराष्ट्र नवनिर्माण सेनेचे प्रमुख राज ठाकरे यांनी केले असले, तरी परप्रांतीयांबाबत असलेली आमची भूमिका कायम आहे असे ते म्हणाले. नगर येथे पक्षसंघटनेचा आढावा घेण्यासाठी नांदगावकर शुक्रवारी (ता. ३०) आले होते.

पक्षाच्या बैठकीनंतर झालेल्या पत्रकार परिषदेत संवाद साधला. ते म्हणाले, ‘ठाकरे यांनी अगोदर मोदी यांच्या समर्थनार्थ भूमिका घेतली होती. त्या वेळी त्यांनी जे चित्र उभे केले होते, ते फसवे असल्याचे आता समोर आल्यामुळे ‘मोदीमुक्त’ची भूमिका घेतली आहे. राज्यामध्ये अगोदर मराठी तरुणाला रोजगार मिळाला पाहिजे. त्याला डावलून परप्रांतीय तरुणाला रोजगार देणे खपवून घेतले जाणार नाही. आजही हीच भूमिका आहे. ‘मोदीमुक्त’साठी ठाकरे यांनी सर्वपक्षीयांना एकत्र येण्याचे आवाहन केले असले, तरी आमची भूमिका कायम आहे. त्यामुळे ज्यांना यायचे असेल, त्यांनी आमच्याबरोबर यावे.’ 

सुरवातीला मनसे पक्ष चांगला वाढला. चौदा आमदार निवडून आले होते, नाशिकमध्येही सत्ता मिळविली; मात्र ही हवा आमच्या डोक्‍यात गेल्यामुळे पक्षाची आजची अवस्था झाली,’ अशीही कबुली त्यांनी दिली. तसेच शिवसेना, भाजप, काँग्रेस, राष्ट्रवादी यांना पर्याय म्हणून आमच्याकडे पाहू नका, तर राज्यातील प्रश्‍न सुटण्यासाठी उपाय म्हणून आमच्याकडे पाहिले जावे, असेही ते म्हणाले. 

पवार यांच्याविषयीही तेवढाच आदर  

गुढीपाडव्याला राज ठाकरे यांनी केलेले भाषण ज्येष्ठ नेते शरद पवार यांनी लिहून दिलेले होते, असा आरोप होत असल्याकडे लक्ष वेधले असता नांदगावकर म्हणाले, ‘राजसाहेबांना भाषण लिहून देण्याची वेळ आलेली नाही. पवार ज्येष्ठ नेते आहेत. बाळासाहेब ठाकरे यांच्याप्रती जेवढा आदर होता, तेवढाच आदर पवार यांच्याप्रती आहे. पवार-राज ठाकरे भेटीत राजकीय असे काहीही नाही.’

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com