मराठवाड्यात दुष्काळ जाहीर करा ः अजित पवार

औरंगाबाद  ः मराठवाड्यातील अनेक भागांत ऐन पावसाळ्यात टॅंकरद्वारे पाणीपुरवठा केला जात असून, पावसाअभावी पिके करपली आहेत. खरिपातील सर्वच पिके हातची गेली असल्याने मराठवाड्यात तातडीने मंत्रिमंडळाची बैठक घेऊन दुष्काळ जाहीर करण्यात यावा, अशी मागणी राष्ट्रवादी काँग्रेसचे नेते, माजी उपमुख्यमंत्री अजित पवार यांनी केली.

राष्ट्रवादी युवक काँग्रेसतर्फे बुधवारी (ता. २६) श्री. पवार यांच्या उपस्थितीत औरंगाबाद येथे विभागीय बूथ कमिटी सक्षमीकरण संकल्प मेळावा घेण्यात आला, त्या वेळी ते बोलत होते. या वेळी विधान परिषदेचे विरोधी पक्षनेते धनंजय मुंडे, आमदार राजेश टोपे, सतीश चव्हाण, राष्ट्रवादी युवक काँग्रेसचे प्रदेशाध्यक्ष संग्राम कोते पाटील, भाऊसाहेब तरमळे उपस्थित होते.

श्री. पवार  म्हणाले, की या सरकारने कर्जमाफीची फक्त घोषणा केली. त्याचा अद्यापही अनेकांना लाभ मिळालेला नाही. पेट्रोल, डिझेलचे दर वाढत चालले असताना सरकारला त्याचे देणे-घेणे नाही. दुधाचे अनुदान अजून मिळत नाहीये. बोंड अळीमुळे झालेल्या नुकसानाचे; तसेच तूर, सोयाबीनचे पैसे मिळालेले नाहीत. राज्याचा महसूल उत्पन्नाचा वेग मंदावला आहे. राफेल प्रकरणात गंभीर आरोप होत असताना पंतप्रधान नरेंद्र मोदी बोलायला तयार नाहीत. सध्याचे सरकार नाकर्ते आणि फेकू आहे. निवडणुकीच्या काळात दिलेल्या आश्‍वासनांचे काय झाले, असे प्रश्‍न आता विचारायला हवेत. गल्लीपासून दिल्लीपर्यंत सत्ता दिली तरी सरकार काहीही कामे करीत नाही. मुळात सरकार चालविण्यासाठी पात्रता लागते. नेमकी तीच त्यांच्याकडे नाही, असा टोलाही श्री. पवार यांनी या वेळी लगावला. 

पक्ष संघटनेबाबत ते म्हणाले, की अनेक भागांत पक्षाची ताकद नसली म्हणून कार्यकर्त्यांनी प्रयत्न करणे सोडू नये. बेरजेचे राजकारण करण्यास शिकावे. लोकांना बदल हवा आहे, तो पर्याय राष्ट्रवादी काँग्रेसच्या रूपाने जनतेला द्यावा.