दुष्काळ जाहीर करण्याबाबत टोलवाटोलवी ः अजित पवार

पुणे : राज्यात अनेक ठिकाणी दुष्काळी स्थिती असूनही केंद्रातील व राज्यातील भारतीय जनता पक्षाचे सरकार दुष्काळ जाहीर करण्याबाबत टोलवाटोलवी करत आहे. तसेच केवळ भावनिक मुद्द्यांना हात घालून निवडणुका लढविण्याचे काम सत्ताधाऱ्यांकडून सुरू आहे, अशी टीका माजी उपमुख्यमंत्री अजित पवार यांनी सोमवारी (ता. २२) केली. तसेच कर्जमाफीमध्ये भ्रष्टाचार झाल्याच्या शिवसेना नेते उद्धव ठाकरे यांनी केलेल्या वक्तव्याचाही पवार यांनी चांगलाच समाचार घेतला. राज्यात परतीचा पाऊस न पडल्यामुळे अनेक जिल्ह्यांत व तालुक्यांत दुष्काळी स्थिती निर्माण झाली असूनही राज्य शासनातर्फे दुष्काळ जाहीर केला जात नसल्याच्या निषेधार्थ राष्ट्रवादी काँग्रेस पक्षाच्या वतीने विभागीय आयुक्त कार्यालयावर मोर्चा काढण्यात आला. या वेळी अजित पवार यांनी पत्रकारांशी संवाद साधला. या वेळी खासदार सुप्रिया सुळे यांच्यासह राष्ट्रवादीचे पदाधिकारी व कार्यकर्ते मोठ्या संख्येने उपस्थित होते. श्री. पवार म्हणाले, पंतप्रधान नरेंद्र मोदी यांनी महाराष्ट्राला निधी कमी पडू देणार नाही, अशी घोषणा शिर्डीतील कार्यक्रमात केली. मात्र, केंद्राच्या समितीने पाहणी केल्यानंतरच दुष्काळ जाहीर केला जाईल, असे राज्य शासनाकडून सांगितले जात आहे. त्यामुळे दुष्काळ जाहीर करण्याबाबत शासनाकडून वेळकाढूपणा केला जात आहे. कर्जमाफीमध्ये भ्रष्टाचार झाल्याचा आरोप शिवसेना नेते उद्धव ठाकरे यांनी केला आहे. मात्र, सत्तेत असणऱ्या सत्ताधारी पक्षाने असा आरोप करणे योग्य नाही. शिवसेनेच्या नेत्यांनी याचा जाब विचारणे आवश्यक आहे. ‘‘भाजप सरकारच्या वतीने टँकरमुक्त महाराष्ट्राची वल्गना करण्यात आली. त्यासाठी जलयुक्त शिवार अभियानासाठी हजारो कोटी रुपयांचा निधी खर्च करण्यात आला. मात्र, जलयुक्त शिवारची कामे झाली, त्याच ठिकाणी भूगर्भातील पाणीपातळी एक ते दीड मीटरने कमी झाली असल्याचा अहवाल शासनाच्याच भूजल सर्वेक्षण विभागाकडून दिला जात आहे. त्यामुळे शासनाचे जलयुक्त शिवार अभियान पूर्णपणे अपयशी झाले आहे. कुठे भ्रष्टाचार झाला याची माहिती जनतेला मिळाली पाहिजे,’’ असेही अजित पवार म्हणाले.