अकोला, बुलडाण्यात वाढीव मतदान कुणाला तारणार?

अकोला  : लोकशाहीचा उत्सव म्हणून गणना केलेल्या लोकसभा निवडणुकीसाठी गुरुवारी (ता. १८) अपेक्षेपेक्षा अधिक मतदान झाले. अकोला लोकसभा मतदारसंघात ५९.९८ टक्के, तर बुलडाणा मतदारसंघात ६३.५४ टक्क्यांवर मतदान झाले. २०१४ च्या मतदानापेक्षा दोन्ही मतदारसंघांत सुमारे दीड ते दोन टक्के मतदान वाढले आहे. त्याचा नेमका कुणाला फायदा होणार, हे आता २३ मे रोजी येणाऱ्या निकालांमधूनच स्पष्ट होईल.

बुलडाणा मतदारसंघात ६३.५८ टक्के मतदानाची नोंद करण्यात आली. या जिल्ह्यात मलकापूर विधानसभा मतदारसंघ रावेर लोकसभा मतदारसंघात असल्याने तेथे मतदान नव्हते. उर्वरित सर्वच तालुक्यांमध्ये मतदान झाले. यावेळी जिल्ह्यात तिरंगी लढत झाली. शिवसेनेचे प्रतापराव जाधव यांना राष्ट्रवादीचे डॉ. राजेंद्र शिंगणे यांनी जोरदार लढत दिली. तसेच बहुजन वंचित आघाडीचे बळीराम सिरस्कार यांनीही जोरदार मुसंडी मारली. या तिघांमध्ये काट्याची लढत होऊ घातली आहे.

तरुण मतदारांचा टक्का नेमका कुणाच्या पारड्यात पडतो, यावर या तिघांपैकी एकाचा विजय ठरणार आहे. बहुसंख्य मतदारांचा कौल पाहता जाधव, शिंगणे यांच्यात चुरशीची लढत अपेक्षित आहे. बुलडाणा जिल्ह्यात २०१४ मध्ये ६१.३१ टक्के मतदान झाले होते.  अकोला मतदारसंघात २०१४ ला ५८.५० टक्के मतदान झाले होते. यावेळी ५९.९८ टक्के मतदान झाले. अकोल्यात भाजपचे संजय धोत्रे यांना कॉंग्रेसचे हिदायत पटेल, बहुजन वंचित आघाडीचे अॅड. प्रकाश आंबेडकर यांनी किती टक्कर दिली, यावर विजयाचे गणित ठरेल.

या मतदारसंघात कॉंग्रेसपेक्षा बहुजन वंचित आघाडीचा उमेदवार अधिक मते घेईल, असे राजकीय जाणकार गणिते मांडत आहेत. मतांचे विभाजन कसे व किती होते, यावर विजय ठरेल. तीनही उमेदवारांकडून विजयाची खात्री व्यक्त होत आहे.