अकोला ः सातबारा डिजिटल करण्याच्या प्रकल्पात अकोला जिल्ह्यात ९७.५५ टक्के काम पूर्ण झाले असून, अकोला जिल्हा राज्यात प्रथम क्रमांकावर आहे. तसेच डिजिटल इंडिया भूमिअभिलेख आधुनिकीकरण कार्यक्रमांतर्गत अकोला जिल्ह्याचे अभिलेख स्कॅनिंगचे काम शंभर टक्के पूर्ण झाले आहे. आयुष्यमान भारत योजनेच्या लाभार्थ्यांना गोल्डन कार्ड वितरणात अकोला जिल्हा राज्यात अव्वल असून, जिल्ह्यात २ लाख एक हजार १२७ लाभार्थ्यांना कार्ड वितरित करण्यात आले आहे, अशी माहिती जिल्ह्याचे पालकमंत्री डॉ. रणजित पाटील यांनी दिली. येथील जिल्हाधिकारी कार्यालयाच्या प्रांगणात स्वातंत्र्य दिनाचा ७२ वा वर्धापन दिन सोहळा झाला. या वेळी जिल्हाधिकारी जितेंद्र पापळकर, जिल्हा परिषदेचे मुख्य कार्यकारी अधिकारी आयुष प्रसाद, जिल्हा पोलिस अधीक्षक अमोघ गावकर, मनपा आयुक्त संजय कापडणीस यांच्यासह इतर उपस्थित होते. या वेळी डॉ. पाटील म्हणाले, अकोला जिल्ह्यात जागतिक बँकेच्या अर्थसाह्याने नानाजी देशमुख कृषी संजीवनी प्रकल्प राबविण्यात येत आहे. यात ४९८ गावांची निवड करून आत्तापर्यंत ३७६ लाभार्थ्यांना १ कोटी ४ लाख रुपयांचा लाभ थेट बॅंक खात्यांत देण्यात आला आहे. पंतप्रधान पिकविमा योजनेअंतर्गत या वर्षी खरीप हंगामात १ लाख ९४ हजार ८४६ शेतकऱ्यांनी ९० हजार १९२ हेक्टर क्षेत्र विमा संरक्षित केले आहे. मागील वर्षीच्या ३८ हजार ७७२ विमाधारकांना पीकविमा कंपनीकडून नुकसानभरपाई शेतकऱ्यांच्या बॅंक खात्यांत जमा करण्यात आली आहे. अण्णासाहेब पाटील आर्थिक मागास विकास महामंडळांतर्गत छत्रपती राजाराम महाराज उद्योजकता व कौशल्य विकास अभियानांतर्गत स्वयंरोजगारासाठी २ कोटी ७१ लाख १६ हजार ५५७ रुपये इतके कर्जवाटप झाले आहे. दरम्यान, जिल्हा दुष्काळमुक्त करण्यासाठी जलयुक्त शिवार अंतर्गत जिल्ह्यात गेल्या चार वर्षांत ६१३ गावांत जलसंधारणाची कामे सुरू आहेत. जिल्ह्यात ४७८ गावे जल परिपूर्ण झाली आहेत. या कामांमुळे ७२ हजार ४४६ हेक्टर संरक्षित सिंचनाची सुविधा निर्माण झाली आहे. ३३ कोटी वृक्ष लागवड अभियानात जिल्ह्यात आत्तापर्यंत ५२ लाख ६४ हजार वृक्ष रोपांची लागवड करण्यात आली आहे. तसेच ‘एक विद्यार्थी एक झाड’ या अकोला पॅटर्नअंतर्गत जिल्ह्यातील १ लाख ८० हजार विद्यार्थ्यांनी वृक्ष लागवड केली आहे. मत्स्यगंधा वाहनाचे वाटप मत्स्य व्यवसाय करणाऱ्या शेतकरी गटांना जिल्हा वार्षिक योजनेतून देण्यात आलेल्या मत्स्यगंधा या वाहनाचे वितरण या वेळी पालकमंत्री डॉ. रणजित पाटील यांच्या हस्ते करण्यात आले. या वाहनांतून विविध मत्स्यपदार्थ बनवून हे मत्स्य व्यावसायिक विक्री करू शकणार आहेत. त्यासाठी सुसज्ज अशी ही वाहने लाभार्थी गटांना वितरित करण्यात आली.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.