सव्वादोन लाखांवर शेतकरी कर्जामाफीसाठी पात्र

परभणी  ः महात्मा जोतिराव फुले शेतकरी कर्जमुक्ती योजनेअंतर्गत परभणी जिल्ह्यातील २ लाख २३ हजार ६४७ शेतकऱ्यांची कर्जखाती कर्जमाफीसाठी पात्र आहेत. या शेतकऱ्यांना १ हजार २७८ कोटी ६२ लाख ६३ हजार ६०१ रुपये एवढ्या रकमेची कर्जमाफी मिळणार आहे.या बाबत जिल्हा उपनिबंधक (सहकारी संस्था) कार्यालयाच्या सूत्रांनी माहिती दिली. महात्मा जोतिराव फुले शेतकरी कर्जमुक्ती योजनेअंतर्गत जिल्ह्यातील २१ बॅंकाअंतर्गतचे २ लाख २३ हजार ६४७ शेतकरी कर्जदार पात्र आहेत. सर्व बॅंकांची मिळून कर्जमाफीची रक्कम १ हजार २७८ कोटी ६२ लाख ६३ हजार ६०१ रुपये एवढी आहे. कर्जमुक्ती योजनेचा लाभ घेण्यासाठी पात्र शेतकरी खातेदारांना कर्जखात्याशी आधारकार्ड क्रमांक संलग्न करणे अनिवार्य करण्यात आले आहे. पात्र शेतकरी खातेदारांपैकी २ लाख ११ हजार ५६६ शेतकऱ्यांची (९४.६ टक्के) कर्जखाती आधार क्रमांकाशी संलग्न आहेत. अद्याप १२ हजार ८१ कर्जखाती आधार क्रमांकांशी जोडलेली नाहीत. पात्र शेतकऱ्यांपैकी १ लाख ८५ हजार ६२७ शेतकऱ्यांची (८७.७४ टक्के) माहिती कर्जमाफीच्या पोर्टलवर अपलोड करण्यात आली आहे. कर्जमाफीचा लाभ मिळणाऱ्या शेतकऱ्यांमध्ये भारतीय स्टेट बॅंकेच्या कर्जदार शेतकऱ्यांनी संख्या सर्वाधिक १ लाख ६ हजार ९२९ एवढी आहे. जिल्हा मध्यवर्ती सहकारी बॅंकेच्या ४४ हजार ३६६ शेतकऱ्यांना तर महाराष्ट्र ग्रामीण बॅंकेच्या ३५ हजार १५८ शेतकऱ्यांना कर्जमाफी मिळणार आहे. अॅक्सिस बॅंकेचे सर्वात कमी ६४ शेतकरी लाभार्थी असून त्यांना १ कोटी ४५ लाख ८३ हजार २८१ रुपयाचे कर्जमाफी मिळणार आहे. एचडीएफसी बॅंकेची कर्जामाफीची रक्कम सर्वात कमी ४१ लाख रुपये एवढी आहे. कर्जमाफीसाठी लाभार्थी शेतकऱ्यांची पहिली यादी शुक्रवार (ता. २१) पर्यंत प्रसिध्द केली जाईल असे सूत्रांनी सांगितले.