सातारा जिल्ह्यात रब्बी पीककर्जाचे सात टक्केच वाटप

सातारा : जिल्ह्यात खरीप हंगामाप्रमाणेच रब्बी हंगामात पीक कर्जवाटपाकडे बँकाकडून दुर्लक्ष केले जात आहे. रब्बीत गेल्या दोन महिन्यांत अवघे सात टक्के कर्ज वितरण केले असल्याचे आकडेवारीवरून स्पष्ट होत आहे. उर्वरित चार महिन्यांत किती उद्दिष्ट पूर्ण होणार, हा प्रश्‍न आहे.

जिल्ह्यात रब्बी हंगामासाठी ९८० कोटी रुपये पीककर्जाचे उद्दिष्ट ठेवण्यात आले आहे. यापैकी नोव्हेंबर महिनाअखेर ६८ कोटी ८८ लाख रुपये कर्जाचे वितरण केले आहे. दोन महिन्यांत अवघे सात टक्के कर्ज वितरण झाले. खरीप हंगामाप्रमाणेच राष्ट्रीयकृत बँकानी रब्बी हंगामात पीककर्ज वितरणाबाबत निराशा केली आहे. 

राष्ट्रीयीकृत बॅंकांचे ४४६ कोटी ७० लाखांचे उद्दिष्ट असून, यापैकी ३९ कोटी ३२ लाख रुपयांचे कर्ज वितरण केले आहे. त्यांचे नऊ टक्के उद्दिष्ट पूर्ण झाले. राष्ट्रीयीकृत बॅंकांत स्टेट बॅंक ऑफ इंडिया बॅंकेने सर्वाधिक १३ कोटी ४५ लाख कर्ज वितरण केले आहे. या बँकेने १३ टक्के उद्दिष्ट पूर्ण केले आहे. जिल्ह्यात २० राष्ट्रीयीकृत बँकांना कर्जवाटप उद्दिष्टे दिले आहे. यामध्ये १० बँकांनी शून्य कर्जवाटप केले आहे. 

खासगी बॅंकांनी एकूण उद्दिष्टापैकी १५ टक्के कर्जवाटप केले आहे. त्यांना १३१ कोटी ९० लाखांचे उद्दिष्ट आहे. या बँकानी २० कोटी २७ लाख रुपयांचे कर्ज वितरण केले. 

सातारा जिल्हा मध्यवर्ती बॅंकेने नऊ कोटी २५ लाख रुपये कर्जाचे वितरण करण्यात आल. जिल्हा बॅंकेने एकूण उद्दिष्टापैकी २ टक्के कर्जाचे वितरण केले. रब्बी कर्ज वितरण सरू होऊन दोन महिने उलटले. कर्ज वितरणाची मार्चअखेरपर्यंत मुदत आहे. उर्वरित कालवधीत किती कर्जवाटप होईल, हे पाहावे लागेल. खरीप हंगामात राष्ट्रीयकृत बँकानी पीककर्ज वितरणाकडे दुर्लक्ष केले होते. 

शेतकऱ्यांकडे लक्ष द्या

जिल्ह्यातील शेतकऱ्यांना भांडवल कमी पडू नये, यासाठी बँकानी शेतकऱ्यांकडे लक्ष देणे गरजेचे आहे. मागीलवर्षी खरीप हंगामात जास्तीत जास्त शेतकऱ्यांना कर्ज मिळावे, यासाठी बँकनिहाय जागोजागी शेतकरी मेळावे घेण्यात आले होते. यातून शेतकऱ्यांना पीककर्ज मिळण्यास मदत झाली. कर्जाचे वितरणही जास्त झाले. याच धर्तीवर शेतकऱ्यांना आर्थिक आधार देण्यासाठी या हंगामात बँकांनी खरिपाप्रमाणे रब्बीतही शेतकरी मेळावे घेणे आवश्यक आहे.