अमरावती जिल्ह्‍यात कर्जवाटपात राष्ट्रीयीकृत बॅंकांचा टक्‍का घसरला

अमरावती ः जिल्ह्यात गेल्या अडीच महिन्यांत लक्ष्याकांच्या केवळ १३ टक्‍केच कर्जवाटप झाले आहे. परिणामी, खरीप पीककर्जासाठी बॅंकांच्या असहकाराचा सामना शेतकऱ्यांना करावा लागत असल्याचे वास्तव समोर आले आहे.  जिल्ह्यात छत्रपती शिवाजी महाराज शेतकरी सन्मान योजनेअंतर्गत दीड लाख रुपयांपर्यंतची कर्जमाफी देण्यात आली. यासाठी जिल्ह्यात १ लाख ९८ हजार शेतकऱ्यांनी ऑनलाइन अर्ज केले होते. गेल्या दोन वर्षांत १५ ग्रीन लिस्टनुसार १ लाख ५८ हजार शेतकऱ्यांना या योजनेचा लाभ देण्यात आला. अद्यापही ४० हजार शेतकरी कर्जमाफीच्या प्रतीक्षेतच आहेत. या शेतकऱ्यांना कर्जही मिळत नाही अन् कर्जमाफीचा लाभही नाही. मात्र, जे शेतकरी कर्जमाफीस पात्र ठरले. नव्या कर्जासाठी त्यांच्यावर देखील बॅंकांनी उंबरठे झिजवण्याची वेळ आणली आहे. यावर्षीच्या खरीप हंगामासाठी जिल्ह्यातील बॅंकांना १६८५ कोटींच्या कर्जवाटपाचे उद्दिष्ट होते. त्यातुलनेत गेल्या अडीच महिन्यात २३ हजार ५८४ शेतकऱ्यांना २२३ कोटी ३६  लाख रुपयांचेच कर्जवाटप करण्यात आले. कर्जवाटपाची टक्‍केवारी अवघी १३ आहे. त्यावरुनच बॅंकांच्या आणि प्रशासनाच्या हेतूवर शंका उपस्थित होत आहे. राष्ट्रीयीकृत बॅंकांना ११४० कोटी ५० लाख रुपयांच्या कर्जवाटपाचे लक्ष्यांक असताना ७४३६ शेतकऱ्यांना ८७ कोटी ८८ लाख रुपयांचे वाटप झाले. त्याची टक्‍केवारी अवघी आठ आहे. ग्रामीण बॅंकांना १४ कोटी ५० लाखांचे लक्ष्यांक असताना २२८ शेतकऱ्यांना २ कोटी ३६ लाख रुपयांचेच कर्जवाटप आजवर झाले आहे. याची टक्‍केवारीदेखील आठ इतकीच आहे. गेल्यावर्षी तत्कालीन जिल्हाधिकारी अभिजीत बांगर यांनी पीक कर्जवाटपास टाळाटाळ करणाऱ्या सहा बॅंकांतील कार्यालयीन खाती बंद केली होती. यावर्षी जिल्हाधिकारी शैलेश नवाल या संदर्भाने कोणती कारवाई करतात याकडे साऱ्यांचे लक्ष्य लागले आहे.  जिल्हा बॅंकेने केले २५ टक्‍के वाटप  जिल्हा बॅंकेला ५३० कोटींच्या कर्जवाटपाचा लक्ष्यांक असताना १५ हजार ९२० शेतकऱ्यांना १३३ कोटी १२ लाखांचे वाटप करण्यात आले. जिल्हा बॅंकेची पीक कर्जवाटपाची टक्‍केवारी २५ आहे.