अंगणवाडीतील बालकांना घरपोच पोषण आहार

पुणे : कोरोना विषाणूचा प्रादुर्भाव रोखण्यासाठी शाळा, महाविद्यालयांसह अंगणवाड्याही बंद ठेवण्यात आल्या आहेत. अंगणवाडी केंद्रातील तीन ते सहा वयोगटातील बालकांना घरपोच पोषण आहार देण्याचा निर्णय घेण्यात आला आहे. बालकांना २० मार्च ते १५ मेपर्यंतचा आहार घरपोच देण्याचे काम अंगणवाडी कर्मचाऱ्यांनी करावे, असे आदेश जिल्हा परिषदेचे मुख्य कार्यकारी अधिकारी आयुष प्रसाद यांनी दिले आहेत. कोरोनाच्या पार्श्वभूमीवर अंगणवाड्या पूर्णपणे बंद करण्याचा निर्णय घेण्यात आला होता. मात्र बालकांना अंगणवाडीत एकत्रित बसून गरम ताजा आहार यापूर्वी देण्यात येत होता. परंतु एकत्र बसल्याने साथीचा प्रादुर्भाव होऊ शकतो म्हणून तेथे आहार देऊ नये, तसेच अंगणवाड्यांचे कामकाज पूर्णपणे बंद न ठेवता या बालकांना घरपोच आहाराचे वाटप करण्यात यावे, अशा सूचना एकात्मिक बाल विकास सेवा योजनेच्या आयुक्तांकडून देण्यात आल्या आहेत. त्यानुसार पुणे जिल्ह्यातील प्रकल्पांमधील अंगणवाडी केंद्रावर आहार पुरविण्यात येणार आहे.  जिल्ह्यातील ३ ते ६ वयोगटातील १ लाख ३ हजार ७४९ लाभार्थी विद्यार्थ्यांना घरपोच आहार देण्याचे नियोजन आहे. घरपोच देण्यात येणाऱ्या आहारामध्ये हरभरा, मसूरडाळ, तांदूळ, गहू, मिरची पावडर, हळद पावडर, मीठ पॅकिंग स्वरूपात देण्यात येणार आहे.  आहाराचे वाटप करताना मालाचा उत्पादन दिनांक तसेच माल वापरत असल्याचा कालावधी तपासून पुरवठा करावा, धान्य वजनकाट्यावर मोजून घ्यावे, वितरणाच्या कार्यवाहीनंतर उपयोगिता प्रमाणपत्र सादर करावे, पुरवठ्यात तफावत असल्यास व मालाचा दर्जा नसल्यास स्वीकारू नये, मागणीनुसार पुरवठा नसेल तर देयकातून रक्कम वसूल करावी, अंगणवाडी अथवा बचत गटामार्फत पुरवण्यात येणारा गरम ताजा आहार तात्काळ बंद करण्याचे आदेश देण्यात आले आहेत.