पुणे जिल्ह्यात पशुगणनेचे काम अपूर्ण

पुणे   : जिल्ह्यात पशुगणनेचे काम फेब्रुवारी अखेरपर्यंत संपविणे अपेक्षित होते. परंतु, मार्च महिना संपला तरीही अद्याप पशुगणनेचे काम पूर्ण झाले नाही. कामाचा वेग पाहता अजून दोन महिने पशुगणनेला लागतील असे स्थिती आहे. आचारसंहितेचे कारण देत पशुसंवर्धन विभागाकडून कामाला उशीर होत असल्याचे सांगण्यात आले. 

राज्यातील जिल्हानिहाय शेळी, मेंढी, गाय, म्हैस, कोंबडी, बदके व इतर सर्व पशुंची जनगणना केली जाते. त्यानुसार जिल्ह्यात १ ऑक्‍टोबर २०१८ पासून २० व्या पशुगणनेला सुरवात झाली आहे. मागील सहा महिन्यांपासून पशुगणनेचे काम सुरू आहे. तरीही अद्याप ती पूर्ण झालेली नाही. पुणे जिल्ह्यातील ९ लाख कुटुंबांकडील पशुगणना राहिली असून, पशुगणनेमध्ये ग्रामीण भाग राज्यात ९ व्या, शहरी भाग १७ व्या तर संपूर्ण जिल्हा २५ व्या क्रमांकावर आहे. 

पशुगणनेच्या सुरवातीला अनेक तांत्रिक अडचणी आल्यामुळे हे काम संथ गतीने सुरू होते. त्यानंतर संगणक प्रणाली (सॉफ्टवेअर) बदलण्यात आली आणि डिसेंबर महिन्यापासून पुन्हा नव्याने पशुगणना सुरू करण्यात आली. 

राज्य शासनाच्या आदेशानुसार फेब्रुवारी अखेरपर्यंत हे काम पूर्ण करण्याचे उद्दीष्ट राज्य शासनाकडून देण्यात आले आहे. मात्र, त्या मुदतीत काम पूर्ण होणे शक्‍य नसल्यामुळे १५ मार्चपर्यंत मुदतवाढ देण्यात आली. परंतु, अद्याप पशुगणना पूर्ण झालेली नाही. परंत, जी कामे आचारसंहितेपूर्वीच संपवायची होती ती पूर्ण का झाली नाही असा जाब राज्य शासनाकडून विचारला जात आहे. त्यामुळे पशुगणना लवकरात लवकर पूर्ण करण्यासाठी पशुसंवर्धन विभागातील अधिकारी आणि कर्मचाऱ्यांची धावपळ सुरू आहे.