परभणी ः भारतीय कृषी संशोधन परिषदेने महाराष्ट्र पशू व मत्स्य विज्ञान विद्यापीठाअंतर्गत राज्यात मंजूर केलेल्या चार पैकी तीन पशुविज्ञान केंद्र कार्यान्वित झाली आहेत. परंतु मराठवाड्यातील पशुविज्ञान केंद्राचे घोडे अद्याप अडलेलेच आहे. पशुसंवर्धन सेवा अंतर्गत प्रभावी विस्तार शिक्षण कार्यासाठी हे केंद्र कार्यान्वित करणे गरजचे आहे.
कृषी विस्तार कार्यासाठी सुरु केलेल्या कृषी विज्ञान केंद्राप्रमाणे पशुसंवर्धन विस्तार शिक्षण कार्यासाठी भारतीय कृषी संशोधन परिषदेने २०१५ मध्ये राज्यात कोकण, पश्चिम महाराष्ट्र, मराठवाडा, विदर्भ या विभागात पशुविज्ञान केंद्रांना मंजुरी दिली. त्यादृष्टीने मराठवाड्यातील जालना जिल्ह्यातील भोकरदन, अंबड तालुक्यात जागांचे सर्वेक्षण करण्यात आले होते. परंतु त्यापुढे प्रगती झाली नाही.
दरम्यानच्या काळात कोकण, पश्चिम महाराष्ट्र, विदर्भात पशुविज्ञान केंद्र सुरु झाली आहेत. परंतु मराठवाड्यातील पशुविज्ञान केंद्र मात्र कार्यान्वित झाले नाही. सातत्याने दुष्काळाला सामोरे जावे लागत असलेल्या मराठवाड्यातील शेतकरी शेतीपूरक दुग्ध व्यवसाय, शेळी पालन, कुक्कुटपालन व्यवसायाकडे वळत आहेत.
लाल कंधारी, देवणी हे गोवंश, मराठवाडी म्हैस या प्रजातीचे संवर्धन करणे आवश्यक आहे. सद्यःस्थितीत मराठवाडा विभागात परभणी आणि उदगीर येथील पशुवैद्यक महाविद्यालमार्फत विस्तार कार्य केले जाते. परंतु या महाविद्यालयातील रिक्त जागांमुळे विस्तार कार्यासाठी अडचणी येत आहेत. विस्तार शिक्षण कार्य प्रभावीपणे करण्यासाठी मराठवाडा विभागात सर्व सुविधायुक्त पशुविज्ञान केंद्र कार्यान्वित होण्याची नितांत गरज आहे.
विस्तार कार्यासह स्थानिक गोवंशाचे संवर्धन तसेच शासनाच्या विविध योजना शेतकऱ्यांपर्यंत पोचविण्यासाठी मराठवाड्यात पशुविज्ञान केंद्र सुरु होणे गरजेचे आहे. - डॉ. नितीन मार्कंडेय, सहयोगी अधिष्ठाता, पशुवैद्यक व पशुविज्ञान महाविद्यालय,परभणी .
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.