सिंधुदुर्ग ः मुंबईवरून जांभवडे (ता. कुडाळ) येथे आलेल्या आणखी एका २७ वर्षीय व्यक्तीचा अहवाल कोरोना पॉझिटिव्ह आला. त्यामुळे सिंधुदुर्गातील कोरोना रूग्णांची संख्या चारवर पोहोचली आहे. आत्तापर्यंत सापडलेले सर्व रूग्ण मुंबईशी संबंधित आहेत. दरम्यान नव्याने सापडलेल्या रूग्णांसोबत आणखी तिघेजण मुंबईवरून आले असून त्यांचे स्वॅब तपासणीकरिता पाठविण्यात आले आहेत.
कोरोनापासtन काही अंशी सुरक्षित मानला गेलेल्या सिंधुदुर्गात आता कोरोना रूग्णांची संख्या वाढू लागली आहे. २३ मार्चला पहिला रूग्ण सापडला होता. त्यानंतर जवळपास महिनाभर एकही रूग्ण जिल्ह्यात सापडला नव्हता. मुंबईवरून येणाऱ्यांची संख्या वाढू लागली त्यामुळे रूग्णांची संख्या देखील वाढताना दिसत आहे. २८ एप्रिलला मुंबईच्या परळ भागातून चौघेजण जांभवडे (ता. कुडाळ) येथे जात होते. या चौघांना खारेपाटण येथेच प्रशासनाकडून ताब्यात घेत कुडाळ येथे संस्थात्मक क्वारंटाइन करण्यात आले.
बाधीत क्षेत्रातून आल्यामुळे ५ मेस त्यातील एकाचा स्वॅब तपासणीकरिता पाठविण्यात आला होता. त्याचा अहवाल गुरूवारी (ता. ७) सायकांळी उशिरा जिल्हा प्रशासनाकडे प्राप्त झाला असून तो पॉझिटिव्ह आला आहे. कोरोना पॉझिटिव्ह अहवाल आलेल्या हा रूग्ण गावात गेलेला नाही. त्यामुळे त्याचा अन्य कुणाशीही संपर्क आलेला नाही. परंतु त्याच्यासोबत आणखी तिघेजण मुंबईवरून आले आहेत. त्यामुळे त्यांचा अहवाल तपासणीकरिता पाठविण्यात आला आहे.
दरम्यान जिल्ह्यातील रूग्णांची संख्या आता चारवर पोहोचली आहे. आत्तापर्यंत सापडलेले सर्व रूग्ण हे मुंबईशी संबंधित आहेत.तीन चार दिवसांपूर्वी वेंगुर्ला येथील आंबा वाहतूक करणाऱ्या चालकाचा अहवाल पॉझिटिव्ह आला होता.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.