कोयनानगर, जि. सातारा ः येथील कोयना धरणाची पाणी साठवण क्षमता १०५ टीएमसी आहे. त्या धरणातील पाण्याचे विभाजन करण्यासाठी धरणांतर्गत सहा टीएमसी क्षमतेचे छोटे धरण बांधण्यात येणार आहे. त्यासाठी जलसंपदा विभाग जागा बघत आहे, अशी माहिती कोयना धरण सुधारणा व पुनर्वसन समितीचे अध्यक्ष दीपक मोडक व कोयना प्रकल्पाचे मुख्य अभियंता राजेंद्र मोहिते यांनी दिली.
कोयना धरणाच्या जुन्या उपकरणात सुधारणा करून धरणाचे नव्याने पुनर्वसन करण्यात येणार आहे. त्यासाठी जागतिक बॅंक अर्थसाहाय्य करणार आहे, असेही त्यांनी स्पष्ट केले.
शासनाने राज्यातील नऊ प्रमुख धरणांची पाहणी करून सुरक्षा सुधारणा व त्याचे पुनर्वसन करण्यासाठी स्वतंत्र समिती नियुक्त केली आहे. त्या समितीचे अध्यक्ष कोयना प्रकल्पाचे निवृत्त मुख्य अभियंता दीपक मोडक आहेत. या समितीने कोयना धरणाची नुकतीच पाहाणी केली. येथे भेट देण्यापूर्वी समितीने डिंबे, उजनी, सीना-कोलेगाव, राधानगरी, महिंद, कण्हेर, धोम, भाटघर धरणांचीही पाहणी केली. ही समिती शासनाला धरणातील सुधारणांच्या शिफारशी करणार आहे. सध्या ही समिती कोयना धरणाची पाहणी करत आहे.
कोयना प्रकल्पाचे मुख्य अभियंता श्री. मोहिते, सदस्य चंद्रकांत माळी, आर. एस. गायकवाड, एन. डी. आटकेकर, सी. ठाणुवेलू उपस्थित होते.
मोडक म्हणाले, ‘‘कोयना धरणाला साडेसहा दशके झाली आहेत. सहा वक्र दरवाजांतून दर वर्षी नदीपात्रात सोडण्यात येणाऱ्या पाण्यामुळे धरणाचा अप्रोन स्टील बेसीन धरणाच्या तळभागाचे कॉंक्रीट उखडले आहे. त्याचबरोबर कोयना धरणातून पाण्याची गळती होत आहे. ती मोजण्याचे उपकरण जुने झाले आहे. त्यामुळे गळतीची अचूक माहिती मिळत नाही. ती उपकरणे नवीन बसवण्यात येतील. समितीने शिफारशी केलेले काम करण्यासाठी जागतिक बॅंक अर्थसाहाय्य करेल. दोन दिवसांपासून कोयना धरणाची पाहणी समितीकडून झाली आहे.
कोयना धरणात कमी पाणी असल्यावर धरणाची भिंत मागे, तर पाणी जादा असल्यावर भिंत पुढे झुकते, असे एका निष्कर्षातून समोर येत आहे. कोयना धरण हे मर्यादित झुकायला पाहिजे, असे समितीचे मत असून, त्यासाठी कोयना धरणात टिल्ट मीटर व अपलिफ्ट प्रेशर सेल उपकरण बसविण्याची शिफारस केली आहे. त्यानंतर त्यात सुधारणा होईल.’’
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.