यांत्रिकीकरण अभियानाच्या अर्ज प्रक्रियेस प्रारंभ

पुणे:  राज्यात चालू वर्षीही कृषी यांत्रिकीकरण उपअभियान राबविण्यात येत आहे. या अभियानाअंतर्गत शेतकऱ्यांना कृषी अवजारे खरेदीसाठी अर्थसहाय्य देण्यात येणार आहे. त्यासाठी एकूण ९३ कोटी ६५ लाख ३५ हजार रुपयांचा निधी उपलब्ध होणार आहे. अर्ज प्रक्रिया सुरू झाली असून ‘महाडीबीटीमहाआयटी’ या शासनाच्या पोर्टलवर नोंदणी व अर्ज सादर करावेत, असे आवाहन कृषी विभागाच्या सूत्रांनी केले. चालू वर्षी अभियानाच्या अंमलबजावणीकरिता केंद्र शासनाने सुधारित मार्गदर्शक सूचना निर्गमित केल्या आहेत. त्या http://farmech.dac.gov.in या संकेतस्थळावर उपलब्ध आहेत. उपअभियानाच्या केंद्र व राज्य हिस्सा ६०ः४० प्रमाणे आहे. केंद्र शासनाने कृषी अवजारांच्या खरेदीसाठी अर्थसाहाय्यासाठी ४५ कोटी ३५ लाख, भाडे तत्त्वावर कृषी यांत्रिकीकरण सेवा सुविधा केंद्र, कृषी अवजारे बॅंक स्थापनेसाठी १५ कोटी व प्रशासकीय खर्चासाठी २ कोटी १५ लाख याप्रमाणे एकूण ६२ कोटी ५० लाख रुपयांच्या निधीस मान्यता दिली आहे. त्यासाठी केंद्र हिस्स्यापोटी अनुदानाचा ३७ कोटी ५० लाख रुपयांचा निधी उपलब्ध करून देण्यात आला आहे.  अभियानाच्या अंमलबजावणीसाठी राज्य शासनाची प्रशासकीय मान्यता मिळाली आहे. तसेच मागील वर्षातील केंद्र हिश्शाचा अखर्चित निधी ३६ कोटी ९ लाख रूपये पुनर्जिवित करून चालू वर्षी खर्च करण्यात मान्यता देण्यात आली आहे. त्यामुळे यांत्रिकीकरणासाठी मोठ्या प्रमाणात निधी उपलब्ध होणार आहे. राज्य शासनाच्या mahadbtmahait.gov.in हे पोर्टल कार्यान्वित झाले असून शेतकऱ्यांचे अर्ज स्वीकारण्याची कार्यवाही सुरू झाली आहे. शेतकऱ्यांची पोर्टलवर नोंदणी व अर्ज सादर करण्याचे कार्यपद्धतीची माहिती पोर्टलवर ‘ऑनलाइन अर्ज प्रक्रियेसाठी सूचना या सदराखाली देण्यात आली आहे. केंद्र शासनाच्या मार्गदर्शक सूचनांमधील सर्व कृषी अवजारे निवडीसाठी उपलब्ध राहतील.  ट्रॅक्टरसाठी शासननिर्णयाद्वारे घोषित केल्यानुसार अनुसूचित जाती, जमाती, अल्प व अत्यल्प भूधारक आणि महिला शेतकरी यांना किमतीच्या ५० टक्के किंवा एक लाख २५ हजार रुपये यापैकी कमी असेल ते आणि इतर शेतकऱ्यांसाठी किमतीच्या ४० टक्के किंवा एक लाख रूपये यापैकी कमी असेल ते अनुदान मर्यादा राहील. इतर अवजारांसाठी मार्गदर्शक सूचनांनुसार अनुदान मर्यादा राहील, अशी माहिती कृषी निविष्ठा व गुणनियंत्रण संचालक दिलीप झेंडे यांनी दिली.

कृषी अवजारे बॅंकेसाठी सव्वातीन कोटी कृषी कल्याण अभियान मोहिमेअंतर्गत यांत्रिकीकरण उपअभियानामधील राज्यातील नंदुरबार, उस्मानाबाद, वाशीम व गडचिरोली या चार जिल्ह्यांतील निवडक गावांमध्ये प्रतितालुका दोन प्रमाणे कृषी अवजारे बॅंक स्थापनेसाठी अर्थसाहाय्य या घटकांच्या अंमलबजावणीसाठी ५ कोटी १२ लाख रुपयांच्या निधीला मान्यता दिली आहे. केंद्र हिस्स्यापोटी अनुदानाचा ३ कोटी २० लाख निधी उपलब्ध करून दिला आहे.