चारा, पाण्याची व्यवस्था करा : आमदार गणपतराव देशमुख

सांगोला, जि. सोलापूर  : राज्यात दुष्काळी परिस्थिती गंभीर अाहे. पाणी, शेती, रोजगार यासह जनावरांचे हाल होत आहेत. शासनाच्या वतीने मोठ्या जनावरांसाठी छावण्या सुरू झाल्या आहेत. त्याच पद्धतीने सरकारने शेळ्या-मेंढ्यांच्या चारा-पाण्याची सोय करावी, यासाठी सरकारकडे पाठपुरावा करणार आहे, अशी माहिती शेकापचे ज्येष्ठ नेते, आमदार गणपतराव देशमुख यांनी दिली.

डोंगरगाव (ता. सांगोला) येथे डॉ. आंबेडकर शेती विकास व संशोधन संस्थेने सुरू केलेल्या शेळ्या-मेंढ्यांच्या छावणीस देशमुख यांनी भेट दिली. संस्थेचे ललित बाबर, ज्ञानेश्‍वर ठोकळे, नंदू मोरे, दिनकर कांबळे, पांडुरंग बाबर, विशालदीप बाबर, अर्जुन बाबर, श्रावण बाबर, तुळशीराम कांबळे, रमेश कांबळे आदी उपस्थित होते. 

देशमुख म्हणाले, ‘‘डॉ. आंबेडकर शेती विकास व संशोधन संस्थेचा हा उपक्रम अतिशय स्तुत्य आहे. या छावणीमुळे परिसरातील काही शेळ्या-मेंढ्यांच्या चारा व पाण्याची सोय झाली आहे. या छावणीचा आदर्श समोर ठेवून सरकारने महाराष्ट्रातील लहान जनावरांच्या चारा पाण्यासाठी प्रती शेळी मागे २० रुपये अनुदान द्यावे. तसे धोरण करण्यासाठी महसूलमंत्री चंद्रकांत पाटील यांना पत्र पाठवले.  २००१ ला शेळ्या-मेंढ्यांच्या चारा छावणीसंदर्भात शासन निर्णय करण्यात आला होता. मात्र, त्याची अंमलबजावणी झाली नाही.’’

ललित बाबर यांनी शेळ्या-मेंढ्यांसाठी एक मेपासून डोंगरगाव या ठिकाणी छावणी सुरू केली आहे. त्यात डोंगरगाव, गळवेवाडी, सोनंद व परिसरातील ५०० शेळ्या-मेंढ्या दाखल झाल्या आहेत. दररोज त्यांना गोळी पेंड, हरभरा भुसा, मका, लहान शेळ्या-मेंढ्यांसाठी हायड्रोपोनिक पद्धतीने निर्माण केलेला चारा दिला जात आहे. एस. एम. जोशी सोशलिस्ट फाउंडेशन, इकोनेट, कासा, एक्‍शन एड व अन्य काही संस्थांच्या सहकार्यातून ही छावणी चालवली जात आहे. संस्थेचे अध्यक्ष ज्ञानेश्‍वर ठोकळे यांनी आभार मानले.