मराठवाड्यात आजपासून कृत्रिम पावसाचा प्रयोग

औरंगाबाद : मराठवाड्यात शुक्रवारपासून (ता.९) कृत्रिम पावसाचा प्रयोग केला जाणार आहे. त्यासंबंधीची पूर्वतयारी पूर्ण करण्यात आल्याची माहिती महसूल उपायुक्‍त सतीश खडके यांनी गुरूवारी (ता.८) पत्रकार परिषदेत दिली. मराठवाडा वगळता राज्यात सर्वदूर पावसाचे प्रमाण अपेक्षेनुरूप वा त्याही पुढे जाऊन आहे.  मराठवाड्यात मात्र पावसाने ओढ दिल्याने भर पावसाळ्यात शेकडो टॅंकरने पाणीपुरवठा करण्याची वेळ प्रशासनावर आली आहे. याआधी मराठवाड्यात झालेला कृत्रिम पावसाचा प्रयोग लक्षात घेता पुन्हा तो प्रयोग नैसर्गिकरित्या पाउस पडत नसल्याने केला जाण्याची मागणी पुढे आली होती. त्यासाठी शासनाने जवळपास 30 कोटी रुपयांच्या निधीची तरतूदही केली होती. पण प्रयोग प्रत्यक्षात येत नव्हता. रविवारी (ता. 4) विभागीय आयुक्‍तालयाच्या इमारतीवर रडार फिट केल्यानंतर कृत्रिम पावसाचा प्रयोग होईल अशी आशा निर्माण झाली होती. अखेर या प्रयोगासाठी मुहूर्त मिळाला आहे. उद्यापासून चाचणीरूपात कृत्रिम पावसाच्या प्रयोगाला सुरवात केली जाणार आहे. अजून 52 दिवसांचा कालावधी आपल्या हातात आहे. सप्टेबरपर्यंत व त्यानंतर वाढीव पंधरा दिवस अशा कालावधीत मराठवाड्यात कृत्रिम पावसाचा प्रयोग केला जाईल. या प्रयोगासाठी लागणाऱ्या पंधरा परवानग्या मुख्यत्र्यांच्या पुढाकारातून विक्रमी वेळात केवळ पंधरवड्यात मिळविण्यात आल्या. रडारची स्थापना विभागीय आयुक्‍तालयाच्या इमारतीवर करण्यात आल्यानंतर आयुक्‍तालयाच्या तिसऱ्या माळ्यावर त्यासाठी नियंत्रण कक्ष उभारण्यात आला आहे. रडार, एअर क्राफ्ट, फ्लेअर्स आदीचा समन्वय साधून हा प्रयोग केला जाणार आहे. प्रयोगाच्या कालावधीदरम्यान दररोज सकाळी पावसाचे ढग नेमके कोणत्या भागात आहेत, त्या भागातील प्रत्यक्ष पावसाचे प्रमाण किती, तेथे पावसाची गरज आहे का याची तपासणी करूनच ढगांमध्ये पावसासाठीचे बीजारोपण करायचे किंवा नाही याचा निर्णय घेतला जाणार आहे.