गडचिरोलीत युरियाची कृत्रिम टंचाई

गडचिरोली : जिल्ह्यात दोन महिन्यानंतर बरसलेल्या पावसामुळे धान रोवणीच्या कामाला वेग आला आहे. त्यामुळे शेतकऱ्यांची युरियाची मागणी वाढली असतानाच युरियाची कृत्रिम टंचाई निर्माण करीत काळाबाजार होत आहे. यावर नियंत्रण मिळवावे, अशी मागणी शेतकरी कामगार पक्षाचे जिल्हा सरचिटणीस रामदास जराते यांनी जिल्हाधिकाऱ्यांकडे केली आहे.

कृषिमंत्री दादा भुसे गेल्या महिन्यात जिल्हा दौऱ्यावर आले होते. यावेळी त्यांनी शेतकऱ्यांना थेट बांधावरच निविष्ठांची उपलब्धता होईल, असे जाहीर केले. जिल्ह्यात गेल्या दोन महिन्यांपासून समाधानकारक पाऊस झाला नाही परिणामी सर्वदूर रोवणीचे काम रखडले. आता पावसाने हजेरी लावल्याने रोवणीच्या कामाला देखील वेग आला आहे. अशावेळी शेतकऱ्यांना युरियाची गरज असताना कृत्रिम टंचाईआड युरियाचा काळाबाजार केला जात आहे. त्यामुळे बांधावर नाही तर निदान कृषी सेवा केंद्रात तरी युरियाची उपलब्धता व्हावी, अशी मागणी जराते यांनी केली आहे.

युरियाची बॅग २६६ रुपयाला मिळते. परंतु टंचाईआड शेतकऱ्यांकडून तीनशे ते साडेतीनशे रुपये आकारले जात आहेत. सेवा सहकारी सोसायटी, बचत गट आदींकडून युरियाची मागणी करूनही डीलरकडून पुरवठा होत नाही. त्याचाही परिणाम युरियाच्या उपलब्धतेवर झाला आहे या प्रकाराकडे जिल्हा अधीक्षक कृषी अधिकारी कार्यालयाचे दुर्लक्ष होत असल्याचा आरोपही जराते यांनी केला आहे.  या संपूर्ण प्रकाराची चौकशी करून युरिया डीलर तसेच किरकोळ विक्रेते त्यांच्यावर कारवाई करण्यात यावी, अशी मागणी आहे.