राज्यात दुष्काळसदृश नाही, तर दुष्काळ जाहीर करा : अशोक चव्हाण

मुंबई : यंदा झालेल्या कमी पावसामुळे राज्याच्या अनेक भागांत भीषण दुष्काळी परिस्थिती आहे. खरिपाची पिके वाया गेली आहेत. रब्बीची पेरणीही झाली नाही. पिण्याच्या पाण्याची तीव्र टंचाई आहे. जनावरांना चारा नाही. संपूर्ण महाराष्ट्र दुष्काळात होरपळतोय, तरीही सरकार राज्यात दुष्काळसदृश परिस्थिती आहे, असे सांगून जनतेची फसवणूक करत आहे. राज्यात दुष्काळसदृश नाही, तर दुष्काळ जाहीर करावा, अशी मागणी करून जलयुक्त शिवार हा राज्यातील सर्वांत मोठा घोटाळा आहे, अशी टीका महाराष्ट्र प्रदेश काँग्रेस कमिटीचे अध्यक्ष खासदार अशोक चव्हाण यांनी केली.  गांधी भवन येथे पत्रकार परिषदेत खासदार चव्हाण म्हणाले की, काँग्रेस पक्षाने नाकर्त्या सरकारविरोधात राज्यव्यापी जनसंघर्ष यात्रा सुरू केली आहे. जनसंघर्ष यात्रेच्या तिसऱ्या टप्प्याचा व मराठवाडा दुष्काळ पाहणी दौऱ्याची सुरवात बुधवारी (ता.२४) महाराष्ट्राची कुलस्वामिनी तुळजाभवानीचा आशीर्वाद घेऊन तुळजापूर येथून आम्ही करणार आहोत. राज्यभरात शेतकरी दुष्काळ जाहीर करण्याची मागणी करत आहाेत पण सरकार मात्र दुष्काळ जाहीर करण्यात चालढकलपणा करत आहे. त्यामुळे शेतकरी वर्गात प्रचंड संताप आणि नैराश्याचे वातावरण आहे. त्यामुळे या दुष्काळ पाहणी दौऱ्याच्या माध्यमातून काँग्रेस नेते मराठवाड्यातील शेतकऱ्यांशी संवाद साधणार आहेत.  सरकारने आता शेतकऱ्यांचा अंत पाहू नये. तात्काळ चारा छावण्या व टँकर सुरू करावेत. दुष्काळ जाहीर करण्यासाठी मुहूर्ताची वाट न पाहता सरकारने तात्काळ दुष्काळ जाहीर करावा. ‘‘भाजप सरकारने जनतेला दिलेले एकही आश्वासन पूर्ण केले नाही. उलट वारंवार खोटे बोलून जनतेची फसवणूक व विश्वासघात केला आहे. शेतकरी, कष्टकरी, दलित, अल्पसंख्याक, महिला, विद्यार्थी, तरुण असे सर्वच घटक सरकारवर नाराज आहेत. मराठा, मुस्लिम, धनगर समाज आरक्षणाच्या मागणीसाठी आंदोलन करीत आहेत. संपूर्ण महाराष्ट्र सरकारविरोधात रस्त्यावर उतरल्याचे चित्र आहे,’’ असेही श्री. चव्हाण म्हणाले. या दौऱ्यात प्रमुख काँग्रेस नेत्यांसह कार्यकर्ते उपस्थित राहणार आहेत.