शेती, सहकार संपवण्याचा सत्ताधाऱ्यांचा प्रयत्न ः अशोक चव्हाण

काॅंग्रेसची जनसंघर्ष यात्रा
काॅंग्रेसची जनसंघर्ष यात्रा

इंदापूर, जि. पुणे  ः ‘अच्छे दिन’चे स्वप्न दाखवून सत्तेत आलेल्यांनी चार वर्षे फसवे राजकारण करीत शेती, सहकार, साखर कारखानदारी संपविण्याचा प्रयत्न केला. खोटे बोला, पण रेटून बोला ही त्यांची संस्कृती आहे. ‘देशात नरेंद्र, राज्यात देवेंद्र, जनतेत मात्र दारिद्य्र’ अशी बिकट स्थिती सर्वसामान्यांची झाली आहे. त्यामुळे इंदापूरसह पश्‍चिम महाराष्ट्रात काँग्रेसचे सर्वाधिक आमदार निवडून आणण्यासाठी सर्वांनी संघटित प्रयत्न करावेत, असे आवाहन प्रदेशाध्यक्ष अशोक चव्हाण यांनी केले.

महाराष्ट्र प्रदेश काँग्रेस कमिटीच्या वतीने देश व राज्यातील भाजप-शिवसेना सरकारविरोधात काढण्यात आलेल्या जनसंघर्ष यात्रेस इंदापुरात बुधवारी (ता.५) सर्वाधिक प्रतिसाद मिळाला. या वेळी माजी मुख्यमंत्री पृथ्वीराज चव्हाण, विधानसभेचे विरोधी पक्षनेते राधाकृष्ण विखे पाटील, माजी महसूलमंत्री बाळासाहेब थोरात, माजी सहकारमंत्री हर्षवर्धन पाटील, आमदार रामहरी रूपनवर व जयकुमार गोरे, दीपक जाधव आदी उपस्थित होते.

या वेळी माजी सहकार व संसदीय कार्यमंत्री हर्षवर्धन पाटील यांच्या विधानसभा उमेदवारीची सर्व वक्‍त्यांनी उत्स्फूर्त घोषणा केली. मात्र काँग्रेसचे प्रदेशाध्यक्ष अशोक चव्हाण यांनी इंदापूरच्या जागेवर काँग्रेस व हर्षवर्धन पाटील यांचा हक्क असून यासंदर्भात पक्षाध्यक्ष राहुल गांधी व राष्ट्रवादी काँग्रेसचे अध्यक्ष शरद पवार यांच्याशी चर्चा केली जाईल, असे सूतोवाच केले. या वेळी पंतप्रधान नरेंद्र मोदी, मुख्यमंत्री देवेंद्र फडणवीस यांच्या शेतकरी, सहकारविषयक धोरणांवर कडकडून टीका करण्यात आली.

माजी मुख्यमंत्री पृथ्वीराज चव्हाण म्हणाले, की १२६ राफेल विमानांची ६२३ कोटी रुपयांनी खरेदी करण्याचे काँग्रेस राजवटीत ठरले. मात्र त्यानंतर भाजप सरकारने केवळ ३६ विमानांची खरेदी १६६० कोटींना केली. यामध्ये ४० हजार कोटी रुपयांचा भ्रष्टाचार झाला आहे. शेतकऱ्यांना दीडपट हमीभाव नाही, युवकांना रोजगार नाही. त्यामुळे दिशाभूल करणाऱ्या या सरकारला त्यांची जागा दाखवावी.’’

या वेळी राधाकृष्ण विखे पाटील, बाळासाहेब थोरात, हर्षवर्धन पाटील, रामहरी रूपनवर, जयकुमार गोरे, दीपक जाधव यांची भाषणे झाली. रघुनाथ पन्हाळकर यांनी सूत्रसंचालन केले. काँग्रेसचे तालुकाध्यक्ष ॲड. कृष्णाजी यादव यांनी आभार मानले.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com