महाटीत उपसरपंचपदासाठी साडेदहा लाखांची बोली

नांदेड ः ग्रामपंचायत निवडणुकीपूर्वी उपसरपंचपदाचा जाहीर लिलाव करून लोकशाहीची थट्टा केल्याचा प्रकार समोर आला आहे. मुदखेड तालुक्यातील महाटी येथे शनिवारी (ता.२१) गावकऱ्यांनी साडेदहा लाखांची बोली लावून उपसरपंचपद बहाल केले.  मुदत संपलेल्या महाटी ग्रामपंचायतीसाठी सरपंच, उपसरपंचपदाचे आरक्षण जाहीर झाले. हे गाव गोदावरीच्या काठावर असून, जिल्ह्यातील सर्वांत जास्त वीटभट्ट्या आहेत. गावालगतच्या गोदावरी नदीमुळे वाळू तसेच वीटभट्टीसाठी लागणाऱ्या मातीच्या अवैध व्यवसायातून कोट्यवधींची उलाढाल होते. त्यामुळे ग्रामपंचायतीच्या पदाधिकाऱ्यांना भाव आला आहे. ग्रामपंचायत आपल्या ताब्यात यावी म्हणून अवैध व्यवसायवाल्यांनी चक्क पदाची बोलीच लावल्याचे पाहावयास मिळाले. तसा एक व्हिडिओ सोशल मीडियावर व्हायरलही झाला. शनिवारी (ता. २१) रात्री आठच्या सुमारास गावातील ओट्यावर गावकरी एकत्रित जमले. उपसरपंचपदासाठी इच्छुक असणाऱ्यांनी पुढे यावे, असे आवाहन करण्यात आले. त्यानुसार गावातील विद्यमान सरपंच प्रतिनिधी बळिराम पाटील ढगे, निवृत्त रेल्वे कर्मचारी व्यंकट ढगे, माजी सरपंच माधवराव तानाजी ढगे यांनी बोलीत सहभाग घेतला. बोलीची सुरुवात सात लाख एक हजार रुपये होती. स्पर्धा वाढत गेली तशी बोलीही वाढली. अखेर साडेदहा लाखांची शेवटची बोली माधवराव तानाजी ढगे यांनी लावली. गावकऱ्यांनी त्याला हिरवा कंदील दिला. अशाप्रकारे या गावात लिलावाने उपसरपंचपद साडेदहा लाखांत विकले गेले. या गावातील सरपंचपद ओबीसीसाठी आरक्षित झाले आहे.

बोलीतील रक्कम शाळेसाठी उपसरपंचपदाच्या बोलीचा व्हिडिओ झपाट्याने सोशल मीडियावर व्हायरल झाला. त्यानुसार बोलीत भाग घेतलेल्या बळिराम पाटील ढगे यांच्याशी संपर्क साधला असता त्यांनी लावलेली बोली खरी असल्याचे सांगितले. गावातील शाळेसाठी डिजिटल खोल्या बनविण्याचा गावकऱ्यांचा मानस होता. बोलीतील पैसा शाळा सुधारण्यासाठी वापरण्यात येणार असल्याचे त्यांनी सांगितले.