औरंगाबादमध्ये शेतकऱ्यांतर्फे महिन्यात सव्वा कोटीच्या भाजीपाला,फळांची विक्री

औरंगाबाद : शेतकरी ते ग्राहक थेट विक्री उपक्रमांतंर्गत शेतकऱ्यांनी ३१ दिवसांत औरंगाबाद शहरात सव्वा कोटी रुपयांच्या फळे-भाजीपाल्याची थेट ग्राहकांना विक्री केली. 

औरंगाबाद शहरात कृषी विभाग, आत्मा, जिल्हा प्रशासन, शेतकरी व शेतकरी गट, शेतकरी उत्पादक कंपनी यांच्या समन्वयातून शेतकरी ते ग्राहक थेट फळे भाजीपाला विक्री उपक्रम २९ मार्चला सुरू करण्यात आला. सुमारे २१ शेतकरी, शेतकरी गट व शेतकरी उत्पादक कंपन्यांच्या सहभागातून हा उपक्रम सुरू झाला. त्यात ६६ शेतकरी शेतकरी गट व शेतकरी उत्पादक कंपन्या सहभागी आहेत. यामध्ये ६ शेतकरी कंपन्या १२ शेतकरी व जवळपास ४८ शेतकरी गटांचा समावेश आहे. 

या दरम्यान, एका दिवशी १० लाख रुपयांच्या पुढे फळे, भाजीपाला विक्रीचा उच्चांक शेतकऱ्यांनी गाठला. सुरुवातीला दिवसात २ लाख रुपयापर्यंत उलाढाल झाला. आता ती साडेतीन ते चार लाखाच्या पुढे होते आहे. २८ एप्रिलला शेतकऱ्यांनी ७१६० किलो भाजीपाला व १० हजार ६७० किलो फळांची थेट ग्राहकांना विक्री करून ४ लाख ७८ हजार ६०० रुपयांची कमाई केली. सुरुवातीपासून २८ एप्रिलपर्यंत तब्बल १ लाख ८४ हजार ४६३ किलो भाजीपाला, तर २ लाख ९९ हजार ७६३ किलो फळांची विक्री केली. 

‘कोरोना’च्या पार्श्वभूमीवर लॉकडाउन दरम्यान हा उपक्रम ग्राहक, शेतकऱ्यांना फायदेशीर ठरत आहे. नियमांचे पालन करून शेतकऱ्यांनी शेतीमालाच्या थेट विक्रीसाठीचे भविष्यातील संधीचे जाळे अधिक भक्कम करण्याचा प्रयत्न केला आहे.