औरंगाबाद : जिल्ह्यात आधारभूत किमतीने भरड धान्य खरेदी योजनेअंतर्गत सुरू असलेल्या मक्याची खरेदी प्रचंड संथगतीने सुरू आहे. आजपर्यंत निम्म्याच शेतकऱ्यांची मका खरेदी केली. त्यामुळे १५ जुलैपर्यंतच्या मुदतीत उर्वरित शेतकऱ्यांची मका खरेदी करणे शक्य नसल्याची स्थिती आहे.
जिल्ह्यात आधारभूत किमतीने भरड धान्य खरेदी योजनेअंतर्गत मका खरेदीसाठी ८ केंद्रे सुरू करण्यात आली. या आठ केंद्रांवरून आतापर्यंत ७ हजार ४०५ शेतकऱ्यांनी आपली मका १७६० रुपये प्रति क्विंटल या आधारभूत दराने खरेदी व्हावी म्हणून ऑनलाइन नोंदणी केली.
नोंदणी केलेल्या शेतकऱ्यांपैकी केवळ ३ हजार ८९३ शेतकऱ्यांना प्रत्यक्ष खरेदीसाठीचे एसएमएस पाठविण्यात आले. त्यांपैकी २४२८ शेतकऱ्यांकडील ६८ हजार ७४४ क्विंटल मका आधारभूत किमतीने खरेदी करण्यात आला. त्यांपैकी ६४ हजार ४५९ क्विंटल मका शासनाच्या ताब्यात देण्यात आला. तर, ४२८४ क्विंटल मका शासनाच्या ताब्यात देणे बाकी आहे. खरेदीच्या एकूण प्रक्रियेत सिल्लोड येथील गोडाऊनची अडचण वगळता इतर कोणत्याही अडचणी नसल्याची माहिती मार्केटिंग फेडरेशनच्या वतीने देण्यात आली.
दोन दिवसापासून गोडाउनच्या अडचणीपायी सिल्लोड येथील मका खरेदी थांबली आहे. लवकरच गोडाऊनची अडचण दूर करून खरेदी सुरू करण्यात येईल, असे मार्केटिंग फेडरेशनतर्फे सांगण्यात आले.
सूत्रांच्या माहितीनुसार, मका खरेदीसाठी सुरू असलेले पोर्टल राज्यात ६ लाख ५० हजार क्विंटल मका खरेदी केल्यानंतर थांबेल. सध्या राज्यात जवळपास ५ लाख ३५ हजार क्विंटल मका खरेदी झाल्याची माहिती सूत्रांनी दिली. त्यामुळे येत्या काही दिवसांतच खरेदीचा अपेक्षित टप्पा गाठला की ऑनलाइन पोर्टल थांबेल. त्यामुळे नोंदणी केलेल्या शेतकऱ्यांची मका खरेदी करेल की नाही, हा प्रश्न आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.