पुणे : नैर्ऋत्य मोसमी वाऱ्यांनी (मॉन्सून) १४ ऑक्टोबर रोजी महाराष्ट्राचा निरोप घेतल्यानंतर राज्याच्या तापमान चढ-उतार होत आहेत. स्वच्छ सूर्य प्रकाशामुळे दुपारी उन्हाचा चटका वाढून ‘ऑक्टोबर हीट’चा अनुभव आहे. तर किमान तापमानात घट झाल्याने पहाटे गारठा जाणवत आहे. २२ ते २८ ऑक्टोबर या आठवड्याच्या कालावधीत कमाल आणि किमान तापमान सरासरी ते सरासरीपेक्षा कमी राहण्याचा अंदाज हवामान विभागाने वर्तविला आहे.
मॉन्सूनचा माघारी परतल्यानंतर बंगालच्या उपसागरात तयार झालेल्या कमी दाब क्षेत्राच्या प्रभावामुळे विदर्भ, मराठवाड्यात जोरदार पाऊस पडला. १४ ते २० ऑक्टोबर या आठवडाभराच्या कालावधीत विदर्भ, मराठवाडा, उत्तर महाराष्ट्रात सरासरीपेक्षा अधिक पावसाची नोंद झाली. कोकण आणि पश्‍चिम महाराष्ट्रात पावसाची उघडीप होती. तर उर्वरित राज्यात तुरळक पावसाने हजेरी लावली.
राज्यात पावसाने उघडीप दिल्यानंतर उन्हाचा चटका वाढला आहे. हवामान विभागाने जाहीर केलेल्या अंदाजानुसार २२ ते २८ ऑक्टोबर या कालावधीत कमाल तापमानाचा पारा सरासरी ते सरासरीपेक्षा कमी राहण्याची शक्यता आहे.
उत्तर महाराष्ट्र, मराठवाडा, पश्‍चिम विदर्भात कमाल तापमानात सरासरीच्या तुलनेत २ त ४ अंश, तर उर्वरित राज्यात २ अंशांपर्यंत कमी राहण्याची शक्यता आहे. पूर्व विदर्भ, दक्षिण कोकण, दक्षिण मध्य महाराष्ट्रात तुरळक ठिकाणी कमाल तापमान सरासरीपेक्षा २ अंशांपर्यंत अधिक राहण्याचा अंदाज आहे.
राज्यात थंडीची चाहूल लागली असून, पहाटे गारठा जाणवत आहे. किमान तापमानाचा विचार करता २२ ते २८ ऑक्टोबर या कालावधीत राज्यातील किमान तापमान सरासरी ते सरासरीपेक्षा कमी राहणार आहे. सिंधुदुर्ग आणि कोल्हापूर जिल्ह्यांच्या दक्षिण भागात किमान तापमान सरासरी पेक्षा ० ते २ अंशांनी अधिक राहण्याची शक्यता आहे. तर उर्वरित राज्यात किमान तापमान ० ते २ अंशांनी कमी राहण्याचा अंदाज हवामान विभागाने वर्तविला आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.