सोलापुरात कांद्याला सरासरी २१०० रुपये

सोलापूर : सोलापूर कृषि उत्पन्न बाजार समितीच्या आवारात मंगळवारी (ता.२२) कांद्याला प्रतिक्विंटलला किमान १०० रूपये आणि सरासरी २१०० रूपये, तर कमाल ५०५० रूपये दर मिळाला. कांदा निर्यात बंदीच्या निर्णयानंतर दर उतरतील, अशी शक्‍यता होती. पण, उलट दर सुधारले आहेत.

दुसरीकडे करमाळ्यात उडदाची विक्रमी आवक होऊनही उडदाला सर्वाधिक ८ हजार ४०१ रूपये दर मिळाला. या दोन्ही बाजार समितीतील कांदा आणि उडदाच्या दरातील उसळीमुळे शेतकऱ्यांना काहिसा दिलासा मिळाला. 

गेल्या काही दिवसांपासून कांद्याच्या आवकेत काहिशी घट होत आहे. पण, मागणी असल्याने दरात चढ-उतार आहे. सोलापूर बाजार समितीच्या आवारात मंगळवारी १७ हजार २४० क्विंटल इतकी कांद्याची आवक झाली. जिल्ह्यासह नजीकच्या सांगली, पुणे, नगर, उस्मानाबाद भागातून कांद्याची आवक आहे. गेल्या काही दिवसांपासून आवक तशी जेमतेमच आहे. पण, मागणीत सातत्य असल्याने दर काहिसे वधारले. मंगळवारी आवक वाढूनही कांद्याला कमाल दर ५०५० रुपयांपर्यंत होता.  येत्या काही दिवसांत दर आणखी वाढण्याची शक्‍यता आहे. 

उडदाच्या दरात सुधारणा

मंगळवारी करमाळ्यात उडदाचा दर सर्वाधिक ८ हजार ४०१ रुपयांवर पोचला. तर किमान ५ हजार ७००, सरासरी ७ हजार ७०० इतका दर राहिला. कांदा आणि उडदाच्या या दरातील सुधारणेमुळे शेतकऱ्यांना तूर्त तरी दिलासा मिळाला आहे. 

आवक कमी, मागणी जास्त

दरम्यान, दुसरीकडे करमाळा बाजार समितीमध्येही गेल्या पंधरा दिवसात उडदाची रोज १० हजार गोण्या आवक होत होती. त्यामुळे दिवसाआड लिलाव घ्यावे लागत होते. त्याचा दरही साडेपाच हजाराच्या आत होता.  मात्र, गेल्या चार दिवसांपासून उडदाची आवक कमी होत आहे. त्यामुळे इथेही आवक कमी आणि मागणी जास्त अशी तफावत झाल्याने दर वधारले.