रेशन दुकानदारांकडून साखर वाटपास टाळाटाळ

जळगाव  : रेशन दुकानदारांकडून कार्डधारकांना धान्यच देण्यात येत असून त्यातील साखरच गायब होत असल्याचा धक्कादायक प्रकार जिल्हा पुरवठा अधिकाऱ्यांच्या पाहणीत दिसून आला.  जिल्हा पुरवठा अधिकाऱ्यांकडून जिल्ह्यातील रेशन दुकानदारांची तपासणी केली जात आहे. यामध्ये कार्डधारकांची बायोमॅट्रिक पद्धतीने थम घेऊन त्यानंतरच धान्याचे वितरण केले जाते. संपूर्ण जिल्हाभरात ही प्रणाली कार्यान्वित करण्यात आली आहे. अंत्योदय कार्डधारकांना गहू, तांदूळ, डाळ यासह शासनाकडून साखरेचादेखील पुरवठा केलेला आहे. परंतु रेशन दुकानदारांकडून कार्डधारकांना केवळ धान्याचा पुरवठा केला जात असल्याचे जिल्हा पुरवठा अधिकारी सुनील सूर्यवंशी यांनी केलेल्या पाहणीत दिसून आले. तसेच पुढील काही महिन्यात ग्रामसेवक, तलाठी, सरपंच, सप्लाय इन्सपेक्‍टर यांचा अहवाल आल्यानंतरच रेशन दुकानदारांना धान्याचे वाटप करण्याबाबत त्यांचे नियोजन सुरू आहे.  ‘‘जिल्हा पुरवठा अधिकारी यांनी अडावद- ३, चोपडा-६, वटार- १, रावेर-५, पारोळा-७ अशा एकूण २२ ठिकाणी रेशन दुकानांची तपासणी केली. यामध्ये अंत्योदय कार्डधारकांना साखरेचा पुरवठाच केला जात नसल्याचे पाहणीत समोर आले आहे. तसेच वटार येथे अनेक महिन्यांपासून धान्य वाटपच नसल्याने परवाना रद्दच करणार,’’ असल्याचे पुरवठा अधिकारी सूर्यवंशी यांनी दिली.  रावेर तालुक्‍यातील अंत्योदय जो कार्डधारक धान्य घेण्यासाठी आला. त्यालाच आपल्या इच्छेनुसार धान्याचे वाटप केले जाते, तर अनेक तालुक्‍यांमध्ये रेशन दुकानदारांकडून धान्याचे वाटपच केले जात नसल्याचे त्यांनी सांगितले.

... तर तीन महिने परवाना निलंबित करणार  रेशन दुकानदारांकडून कार्डधारकांना धान्याचे वितरण अंत्यत अल्प प्रमाणात केले जात असल्याचे समोर आले आहे. ज्या रेशन दुकानदारांकडून कार्डधारकांना धान्य वाटपात कसूर केला जात आहे. अशा रेशनदुकानदारांचा परवाना तीन महिन्यांसाठी निलंबित केला जाणार असल्याची माहिती पुरवठा अधिकारी यांनी दिली.