जळगाव : वाघूर प्रकल्पग्रस्तांना मोबदल्यास टाळाटाळ

शेंदुर्णी, जि. जळगाव : वाघूर प्रकल्पासाठी २००५ मध्ये जामनेर तालुक्यातील चिंचखेडा, केकतनिंभोरा व अन्य गावांतील शेतकऱ्यांच्या जमिनी, गावठाण जागेचे भूसंपादन अधिकाऱ्यांनी केले. मात्र, अद्याप काही शेतकऱ्यांना त्याचा मोबदला दिलेला नाही.

औरंगाबाद खंडपीठाने आठ आठवड्यांत ७५ टक्के रक्कम देण्याचे आदेश दिले. तरीही महामंडळाने शेतकऱ्यांना रक्कम दिली नाही. या सर्व प्रतिवादींविरुद्ध जंगम वॉरंटमध्ये पहिल्या टप्प्यात वाघूर प्रकल्पाच्या अधिकाऱ्यांचे चारचाकी शासकीय वाहन व संगणक बेलिफ ताडे यांच्यासमक्ष जप्त करण्यात आले. 

या बाबत शेतकरी चिंतामण भोंडे (वय ७९), एकनाथ पाटील (६९, रा. केकतनिंभोरा, ता. जामनेर) यांनी जळगाव न्यायालयात दरखास्त दाखल केली आहे. यात न्यायालयाच्या आदेशानुसार, ही जप्तीची कारवाई करण्यात आली. आता जिल्हाधिकारी, जिल्हा भूसंपादन अधिकारी, अप्पर तापी प्रकल्प हतनूर, जिल्हा पुनर्वसन अधिकारी, कार्यकारी संचालक तापी खोरे विकास महामंडळ जळगाव यांच्याविरोधातही न्यायालयाने जप्ती वॉरंट जारी केले आहे. त्यांची वाहने व इतर सामानाची लवकरच जप्ती होणार आहे.

१५ वर्षांपासून शासकीय कामासाठी गेलेल्या जमिनींचा मोबदला मिळावा, ही अपेक्षा गरीब शेतकऱ्यांनी व्यक्त केली आहे. उर्वरित अधिकाऱ्यांविरोधात लवकरच जप्तीचे वॉरंट बजावले जाणार असल्याची माहिती या शेतकऱ्यांचे वकील ॲड. देवेंद्र पारूळकर व ॲड. कमलाकर बारी यांनी दिली.