पोषक आहाराबद्दल जागरूकता महत्त्वाची : डॉ. मराठे

सोलापूर ः ‘‘आपल्या सर्वांसाठी पोषक आहार आवश्यक आहे. त्यादृष्टीने आहारात त्याचा प्राधान्याने समावेश असावा. विशेषतः माता-बालकांसाठी पोषक आहार अधिक महत्त्वाचा आहे. त्याबाबत विशेष जागरूकता  महत्त्वाची आहे’’, असे मत राष्ट्रीय डाळिंब संशोधन केंद्राचे संचालक डॉ. राजीव मराठे यांनी व्यक्त केले.

केगाव येथील राष्ट्रीय डाळिंब संशोधन केंद्र येथे आंतरराष्ट्रीय भरड धन्य वर्ष निमित्ताने रोपे व पोषण पाकिटे वाटप कार्यक्रमाचे आयोजन करण्यात आले होते. त्यावेळी डॉ. मराठे बोलत होते. संशोधन केंद्राच्या वरिष्ठ शास्त्रज्ञ डॉ. ज्योत्सना शर्मा, शास्त्रज्ञ डॉ. नम्रता गिरी या वेळी उपस्थित होत्या. 

डॉ. मराठे म्हणाले, ‘‘आपण खऱ्या अर्थाने आपले पौष्टिक अन्न ज्वारी, बाजरी, नाचणी, भगर विसरलो आणि गहूयुक्त आहाराचा अतिरेक केला. म्हणून आपले आरोग्य अनेक आजारांनी बाधित झाले. एकेकाळी लोकं म्हणायचे मातेला पोषक आहार असेल, तर सुदृढ बाळ जन्माला येते. पण त्यासाठी पोषक आहाराबद्दल माता देखील जागरूक असायला हवी. त्याच उद्देशाने या कार्यक्रमाचे आयोजन करण्यात आले आहे. याबाबत सर्वस्तरात अधिकाधिक जागरुकता महत्वाची आहे.’’

डॉ. शर्मा म्हणाल्या, ‘‘घरातील महिला ही सर्वांच्या आरोग्याची काळजी घेते. तिचे आरोग्य चांगले राहावे, यासाठी केंद्र सरकारने हा निर्णय घेतला असावा. त्यामागचा उद्देश लक्षात घेऊन महिलांनी पोषक आहाराकडे  लक्ष द्यावे.’’ 

या वेळी सहकारमहर्षि शंकरराव मोहिते पाटील विद्यालयाच्या विद्यार्थिनींना भरडधान्य युक्त पोषण पाकिटे वाटप करण्यात आली. डाळिंबाच्या सोलापूर लाल वाणाची नोंदणी केलेलल्या शेतकऱ्यांना डाळिंबांची रोपे वाटण्यात आली. शास्त्रत्र डॉ. नम्रता गिरी यांनी सूत्रसंचालन केले. वरिष्ठ शास्त्रज्ञ डॉ. निलेश गायकवाड यांनी आभार मानले.