रुंद सरी वरंबा पद्धतीबाबत शेतकऱ्यांमध्ये जनजागृती

जळगाव ः सुसरी (ता. भुसावळ) येथे नुकतेच जळगाव येथील कृषी विज्ञान केंद्रातर्फे रुंद वरंबा सरी पद्धतीबाबत शेतकऱ्यांना मार्गदर्शन करण्यात आले. रुंद वरंबा सरी पद्धतीच्या माध्यमातून पाण्याची बचत होते, अतिपावसातही पिके जोमात येतात. ओलावा टिकून राहतो, असे मत तज्ज्ञांनी व्यक्त केले.

कृषी विज्ञान केंद्र, कृषी विभाग, आत्मा यांच्या अंतर्गत हरभरा पिकामध्ये रुंद सरी वरंबा पद्धत अवलंबून बीजोत्पादन कार्यक्रम घेण्यात येत आहे. सुसरी येथे त्यासंबंधी प्रात्यक्षिक घेतले आहे. त्याची माहिती देण्यात आली. रुंद वरंबा सरी पद्धतीचा अवलंब करणारे शेतकरी अशोक पाटील यांनी आपले अनुभव सांगितले. श्री. पाटील यांनी रुंद वरंबा सरी तंत्राबाबत व हरभरा वाण विक्रम याविषयी समाधान व्यक्त केले. गावातील इतर शेतकऱ्यांनादेखील रुंद सरी वरंबा पद्धतीचा खरीप हंगामात वापर करावा, असे आवाहन करण्यात आले.

डॉ. तेलबिया संशोधन केंद्राचे तज्ज्ञ डॉ. भदाणे यांनी हरभरा पिकामधील उत्पन्न वाढीचे तंत्रज्ञान तसेच बीजोत्पादनाबाबत माहिती दिली. ‘आत्मा’चे उपसंचालक कुर्बान तडवी यांनी परिसरातील हरभरा पिकाची पाहणी करून रुंद सरी-वरंबा पद्धत शेतकऱ्यांसाठी खूपच फायदेशीर ठरत आहे, असे सांगितले. यासोबतच शेतकऱ्यांसाठी शेतीशाळा वर्ग आयोजिण्यासंबंधी आनंद व्यक्त केला.

कृषी विज्ञान केंद्रातील अभियंता वैभव सूर्यवंशी यांनी विशेष प्रयत्न करून सुसरी गावामध्ये रुंद सरी वरंबा पद्धतीचा प्रसार केला. त्याचे लाभ कसे मिळत आहेत, याची माहिती शेतकऱ्यांपर्यंत यानिमित्त पोचली. याबाबतही शेतकऱ्यांनी आनंद व्यक्त केला. गावातील शेतकरी विक्रम पाटील यांनी गटाच्या माध्यमातून बीजोत्पादन कार्यक्रम राबवला. रुंद सरी वरंबा पद्धतीने पेरणी करण्यासाठी ते पुढे आले. याबाबत त्यांचे कौतुक करण्यात आले. प्रास्ताविक डॉ. विशाल वैरागर यांनी केले. प्रमोद जाधव यांनी सूत्रसंचालन यांनी केले.