चिमुकलीने गावातील अस्वच्छतेची कैफियत मांडली थेट 'पीएमओ'कडे

अमरावती ः रस्त्यावरील सांडपाणी, अस्वच्छता आणि खड्ड्यांबाबत सातवीत शिकणाऱ्या एका चिमुकलीने थेट पंतप्रधान कार्यालयाला पत्र लिहिले. पीएमओनेदेखील तिच्या पत्राची दखल घेत ग्रामपंचायत प्रशासनाला स्वच्छता व रस्ते दुरुस्तीचे निर्देश दिले आहेत. तन्वी संजय बडवाईक असे या चिमुकलीचे नाव असून, तिच्या या कार्याचे सर्वच स्तरांतून कौतुक होत आहे. 

पथ्रोट येथील रहिवासी असलेली तन्वी सातवीत शिकत आहे. तिचे वडील एका खासगी पतसंस्थेत लिपिक आहेत. शाळेत जाण्यासाठी घराबाहेर पडल्यानंतर तन्वीचा रस्त्यावरील सांडपाणी आणि खड्ड्यांमुळे अपघात झाला होता. इतरांनाही यामुळे धोका होऊ शकतो, याची जाणीव झाल्याने चिमुकल्या तन्वीने थेट याबाबत पंतप्रधान कार्यालयाशी पत्रव्यवहार केला.

गावाच्या मध्यभागातून वाहणाऱ्या नाल्यांमध्ये कायमस्वरूपी असलेली घाण त्यामुळे शालेय विद्यार्थ्यांना होत असलेला दैनंदिन त्रास याचाही उल्लेख तिने पत्रात केला. पंतप्रधान कार्यालयानेदेखील तिच्या या पत्राची दखल घेतली. सुरुवातीला मुख्यमंत्री कार्यालय, त्यानंतर अमरावती जिल्हाधिकारी कार्यालय, तेथून पथ्रोट पोलिस ठाण्यापर्यंत पत्रव्यवहार करण्यात आला. ग्रामपंचायतीला खड्डे दुरुस्ती व स्वच्छता करण्याचे आदेश या पत्रातून देण्यात आले. त्या अनुषंगाने पथ्रोट पोलिसांनी ग्रामपंचायत प्रशासनासोबत संपर्क साधत खड्डे दुरुस्ती व स्वच्छतेची कार्यवाही करण्यास सांगितले. 

सरपंच गोपाल कावरे यांनी जलस्वराज योजनेच्या अधिकाऱ्यांना समस्या निकाली काढण्याचे निर्देश त्यानंतर दिले. दरम्यान गाव समस्यांबाबत थेट पंतप्रधान कार्यालयाशी पत्रव्यवहार करीत त्या निकाली काढण्यासाठी पुढाकार घेणाऱ्या चिमुकल्या तन्वीचे या धाडसाबद्दल सर्व स्तरांतून कौतुक होत आहे.