केळी, कापसाची खेडा खरेदी बंद

जळगाव ः खानदेशात कापूस फारसा शेतकऱ्यांकडे शिल्लक नाही. परंतु, खेडा खरेदी कोरोना विषाणूमुळे लागू झालेली बंधने व भीती यामुळे बंद आहे. केळीची शिवार खरेदीदेखील वाहतूक, मजूर यासंदर्भातील अडचणींमुळे बंद आहे. खानदेशात मार्चमध्ये कापसाची खेडा खरेदी वेगात सुरू असते. यंदा जागतिक मंदी व इतर कारणांमुळे कापसाची खेडा खरेदी फारशी गतीने सुरूच झाली नाही. मध्यंतरी खरेदी सुरू होती. ती मागील आठवडाभरात बंदावस्थेत आहे. सध्या फक्त मध्य प्रदेश व गुजरातनजीकच्या नंदुरबार, तळोदा, शहादा, शिरपूर, चोपडा, यावल या भागांत कापसाची खरेदी सुरू आहे. तीदेखील अपवादानेच होत आहे. पुढे या खरेदीवर प्रतिकूल परिणाम होईल. कारण बाजारातील उलाढाल हळूहळू कमी होत आहे.  केळीची बाजारात मागणी आहे. परंतु कोरोनाची दहशत ग्रामीण भागापर्यंत पोचली आहे. घरातच राहण्याचे आवाहन प्रशासन करीत असल्याने मजूर, वाहतूकदार शिवारात केळीच्या वाहतुकीसाठी जाण्यास नकार देत आहेत. शिवाय मध्य प्रदेशात केळी पाठवणुकीसंबंधी अडचणी येत आहेत. उत्तर भारतातील केळीची पाठवणुकही जवळपास थांबली आहे. मार्चमहिन्यात रोज २०० ते १८० ट्रक (एक ट्रक १५ टन क्षमता) केळीची काढणी होत असते.  यंदा पाऊस चांगला झालेला असल्याने हंगाम यावल, रावेर, मुक्ताईनगर व नंदुरबार जिल्ह्यातही जोमात आहे. परंतु काढणी हळूहळू ठप्प होत आहे. बाजार समित्यांमध्ये केळीची खरेदी फारशी केली जात नाही.  ३५ कोटींची उलाढाल ठप्प शेतकरी दुय्यम दर्जाची केळी बाजार समितीत पाठवितात. ९८ टक्के केळीची खानदेशात शिवार खरेदी केली जाते. परंतु, ही शिवार खरेदी ठप्प झाल्याने केळीदरांवर दबाव येत आहे. मागील दोन-तीन दिवसांत रोजची ३० ते ३५ कोटी रुपयांची केळी बाजारातील उलाढाल ठप्प झाल्याची स्थिती आहे, अशी माहिती मिळाली.