नांदेड, परभणी, हिंगोली जिल्ह्यात केळी उत्पादकांना `लॅाकडाऊन`चा फटका

नांदेड : लॅाकडाऊनमुळे वाहतुकीवर परिणाम झाला आहे. राज्याअंतर्गंत तसेच राज्याबाहेर केळी पाठविण्यावर मर्यादा आल्या आहेत. संचारबंदीमुळे स्थानिक मार्केटमधील मागणी कमी झाली आहे. केळीच्या घाऊक दरांत प्रतिक्विंटल ३०० ते ४०० रुपयांपर्यंत घसरण होऊन उठाव नाही. उतरावयास आलेले केळीचे घड झाडावरच पिकत आहेत. शेतामध्ये शेकडो क्विंटल केळीची नासाडी होत आहे. उत्पादन खर्चाएवढे उत्पन्न मिळत नसल्याने नांदेड, परभणी, हिंगोली जिल्ह्यातील केळी उत्पादक शेतकरी हवालदिल झाले आहेत. 

नांदेड जिल्ह्यातील अर्धापूर, मुदखेड,भोकर, नांदेड तालुक्यात केळी लागवडीचे क्षेत्र आहे. अर्धापूर-मुदखेड तालुक्यातील केळी उत्पादक पट्ट्यातून उत्तर भारतातील पंजाब, हरियाणा, उत्तर प्रदेश आदी राज्यासह दिल्ली, दक्षिणेतील तेलंगणा राज्यात मोठ्या प्रमाणावर केळी पाठविली जाते. परभणी जिल्ह्यात परभणी, मानवत, पाथरी आदी तालुक्यात, तर हिंगोली जिल्ह्यातील वसमत, कळमनुरी तालुक्यात केळी लागवडीचे क्षेत्र आहे. 

हिंगोली जिल्ह्यातील केळी अन्य राज्यात पाठवली जाते. परंतू सध्या वाहतुकीसाठी पुरेशा प्रमाणात वाहने उपलब्ध होत नसल्याने व्यापाऱ्यांकडून केळीला मागणी नसल्याने शेतकऱ्यांच्या अडचणी वाढल्या आहेत. लॅाकडाऊनपूर्वी केळीचे दर प्रतिक्विंटलला १२०० ते १५०० रुपये होते. गेल्या पंधरा ते वीस दिवसांत ‘कोरोना’चा संसर्ग रोखण्यासाठीच्या उपायोजनांतर्गंत स्थानिक मार्केटमधील केळी खरेदी विक्रीचे व्यवहार ठप्प राहू लागले आहेत. त्याचबरोबर आठवडे बाजार भरविणे देखील बंद करण्यात आले. मागणी कमी झाली आहे. 

केळीची शेतातून अल्प दराने सुध्दा खरेदी करण्यास व्यापारी तयार नाहीत. दररोज शेकडो क्विंटल केळीची नासाडी होत आहे. उत्पादन खर्च निघणे कठीण झाल्यामुळे शेतकरी हवालदिल झाले आहेत.