युरियासाठी केळी बागायतदारांची वणवण

जळगाव : जिल्ह्यात खतपुरवठा संथगतीने सुरू असून, त्यात युरियाची उपलब्धता अतिशय कमी आहे. जुना ५० किलो प्रतिगोणीचा युरिया संपला आहे. नवीन युरिया येत नसल्याने खतटंचाई निर्माण झाली आहे. रावेर, यावल, चोपडा, मुक्ताईनगर, जळगाव भागातील केळी उत्पादकांना युरियाच मिळत नसल्याची स्थिती आहे. सर्वच खत विक्रेते युरिया उपलब्ध नसल्याचे सांगत असून, लिंकिंगही सुरू असल्याची कुरबूर आहे. खताचा वरून पुरवठाच नसल्याचे विक्रेते सांगत आहेत. २० गोण्या हव्या असल्या तर पाच गोण्या देतात. त्यावर आणखी एखादी विद्राव्य किंवा भुकटी स्वरूपातील अन्नद्रव्य लिंकिंगच्या स्वरूपात देतात. त्यावर ३०० ते ३५० रुपये जादा खर्च उचलावा लागत आहे. हा प्रकार मागील महिन्यातही सुरू होता, अशा शेतकऱ्यांच्या तक्रारी आहेत. युरियाचा पुरवठा फक्त ४० टक्केच झाला आहे. जिल्ह्यास या हंगामात अखेरपर्यंत सुमारे सव्वालाख मेट्रिक टन युरिया उपलब्ध करून देण्याचा पुरवठा लक्ष्यांक मंजूर आहे. परंतु अजून ५० हजार मेट्रिक टन युरियाही दाखल झालेला नाही, अशी माहिती मिळाली. केळी, ऊस उत्पादक सध्याच्या दिवसांमध्ये युरिया अधिक खरेदी करतात. ड्रीप व बेसल डोस अशा स्वरूपात हे खत दिले जाते. ते देणे गरजेचे आहे. परंतु युरिया नसल्याने काही शेतकरी मॅग्नेशिअम सल्फेटची खरेदी करून ते ड्रिपद्वारे देत आहेत.