नांदेड जिल्ह्यात केळी लागवड क्षेत्रात वाढ

नांदेड जिल्ह्यात केळी लागवड क्षेत्रात वाढ
नांदेड जिल्ह्यात केळी लागवड क्षेत्रात वाढ

नांदेड ः यंदा लवकरच विहिरी, बोअरची पाणीपातळी वाढली आहे. इसापूर धरणातील उपयुक्त पाणीसाठ्यात वाढ होत आहे. सिंचनासाठी पाणी मिळण्याची खात्री झाली आहे. सद्यःस्थितीत काही भागांत केळी लागवड सुरू आहे.

आॅक्टोबर महिन्यातील कांदेबाग लागवड आणि फेब्रुवारी महिन्यातील रामबाग केळी लागवडदेखील अपेक्षित आहे. त्यामुळे यंदा नांदेड जिल्ह्यातील केळी लागवड क्षेत्रात वाढ होणार आहे. नांदेड जिल्ह्यात केळीचे सरासरी क्षेत्र १० हजार हेक्टरपर्यंत असल्याचे मानले जाते.

अर्धापूर, नांदेड, मुदखेड, हदगाव, भोकर आदी तालुक्यांत केळीची लागवड केली जाते. केळी लागवडीचे जून-जुलै (मृगबाग), आॅक्टोबर (कांदेबाग), फेब्रुवारी (रामबाग) असे तीन लागवड हंगाम मानले जातात. यंदा मृगबाग केळीचे लागवड क्षेत्र जास्त आहे. यंदाच्या हंगामात आजवर ८ हजार हेक्टरवर केळी लागवड झाली असल्याचा अंदाज आहे.

अल्प पावसामुळे सिंचनासाठी पुरेशा प्रमाणात पाणी उपलब्ध होत नसल्यामुळे गेल्या दोन-तीन वर्षांत केळी लागवड क्षेत्रात घट झाली. तुलनेने कमी पाण्यावर किफायतशीर उत्पादन देणाऱ्या हळद या नगदी पिकांचा पर्याय शेतकऱ्यांनी स्वीकारला आहे. परंतु यंदा विहिरी, बोअरना मुबलक प्रमाणात पाणी आले आहे.

इसापूर येथील ऊर्ध्व पैनगंगा प्रकल्पाच्या धरणातील पाणीसाठा ६५ टक्क्यांपर्यंत, तर सिद्धेश्वर धरणातील पाणीसाठा २५ टक्क्यांपर्यंत वाढला आहे. इसापूर धरणातून सिंचनासाठी पाणी आवर्तन मिळण्याची खात्री झाली आहे. त्यामुळे अर्धापूरसह अन्य तालुक्यांतील काही भागांत अजून केळी लागवड सुरू आहे.

मूग, सोयाबीनच्या काढणीनंतर आॅक्टोबर महिन्यात तसेच पाण्याच्या उपलब्धतेनुसार फेब्रुवारी महिन्यातदेखील लागवड होऊ शकते. त्यामुळे केळी लागवड क्षेत्रात आणखीन २ हजार हेक्टरची वाढ अपेक्षित आहे. पाण्याच्या उपलब्धतेमुळे जिल्ह्यातील केळी लागवड क्षेत्रात वाढ होणार आहे.

चांगले उत्पादन मिळते त्यामुळे मृगबाग केळीचे क्षेत्र अधिक आहे. इसापूर धरणातील पाण्याच्या उपलब्धतेमुळे लागवड क्षेत्र वाढणार आहे. - प्रा. आर. व्ही. देशमुख, प्रभारी अधिकारी, वनामकृवि केळी संशोधन केंद्र, नांदेड.

इसापूर धरणातून पाणी मिळण्याची खात्री झाली आहे. मूग, सोयाबीन नंतर अनेक शेतकरी केळी लागवड करतील. - ज्ञानेश्वर माटे, शेतकरी, अर्धापूर, जि. नांदेड

गतवर्षी तीन एकरवर केळी लागवड केली होती. यंदा विहिरींना मुबलक पाणी आल्याने दीड एकरने क्षेत्र वाढवले आहे. अंतरात बदल करून बेड पद्धतीची लागवड केली. - शिवाजी देशमुख, शेतकरी, पार्डी, जि. नांदेड.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com