जळगाव जिल्ह्यात अर्ली कांदेबाग केळीची ३०० हेक्टरवर लागवड

जळगाव  ः जिल्ह्यात चोपडा, जळगाव व पाचोरा भागात मिळून सुमारे ३०० हेक्‍टरवर अर्ली कांदेबाग केळीची लागवड झाली आहे. ही लागवड नोव्हेंबर महिन्याच्या मध्यापर्यंत सुरू राहील, असे संकेत आहेत. 

अर्ली कांदेबाग केळी लागवड मागील महिन्याच्या मध्यात तसेच अखेरीला सुरू झाली. जळगाव व चोपडा तालुक्‍यांतील तापी काठावरील गावांमध्ये ही लागवड अधिक झाली आहे. केळीचे दर मागील दोन महिन्यांपासून टिकून आहेत. शिवाय दर्जेदार केळीला यंदा चांगले दर मिळत असल्याने अनेक शेतकऱ्यांनी धावपळ करून कंद, उतिसंवर्धित रोपांची व्यवस्था करून घेतली व या केळीची लागवड केली. जळगाव तालुक्‍यातील खेडी खुर्द, पिलखेडा, फुपणी, गाढोदे, किनोद, कठोरा, भादली खुर्द, भोकर, सावखेडा खुर्द या भागांत तर चोपडामधील गोरगावले, खेडीभोकरी, माचले, पुनगाव, देवगाव, वाळकी, विटनेर, वढोदा आदी भागांत अर्ली कांदेबाग केळीची लागवड काही शेतकऱ्यांनी केली आहे.

मुगाखाली रिकाम्या झालेल्या क्षेत्रात अर्ली कांदेबाग लागवड अधिक आहे. कारण या क्षेत्रात सेंद्रिय कर्ब तयार होते व यामुळे पिकाची वाढ जोमात होते. शिवाय यंदा परतीचा पाऊस सुरूच असल्याने जमिनीत वाफसा कायम आहे. सिंचनाची कुठलीही गरज या अर्ली कांदेबाग केळीला अजून भासलेली नसल्याचे शेतकऱ्यांनी सांगितले. 

अनेक शेतकऱ्यांनी सोयाबीन, ज्वारीखाली रिकाम्या होणाऱ्या क्षेत्रात ऑक्‍टोबरच्या अखेरीस किंवा नोव्हेंबरमध्ये कांदेबाग केळी लागवडीचे नियोजन केले आहे. यंदा जळगाव, चोपडा व पाचोरा भागात मिळून सुमारे सहा हजार हेक्‍टरवर कांदेबाग केळीची लागवड होण्याची अंदाज आहे. लागवडीसाठी कंदांचा तुटवडा आहे. अनेक शेतकरी रावेर, यावल, मध्य प्रदेशातील पातोंडी, नाचणखेडा, बहादरपूर, नंदुरबारमधील अक्कलकुवा, शहादा, तळोदा भागांतून कंद आणत आहेत. या भागातून कंद शेतापर्यंत आण्यासाठी प्रतिकंद सहा ते सात रुपये खर्च येत आहे. यात वाहतुकीचा खर्च अधिक आहे, असे शेतकऱ्यांनी सांगितले.