खानदेशात केळी दर स्थिर

जळगाव : खानदेशात कांदेबाग केळीची आवक दिवसागणिक वाढत आहे. दरही उठाव कायम असल्याने स्थिर आहेत. सध्या चोपडा, जळगाव, पाचोरा-भडगाव, जामनेर, धुळ्यातील शिरपूर येथे काढणीला वेग आला आहे. किमान दर ७०० व कमाल दर १२२० रुपये प्रतिक्विंटल, असा आहे.  

मध्यंतरी कमाल दर १२४० रुपयांवर होते. दरात किंचित घसरण झाली, पण गणेशोत्सवात केळीला उठाव वाढल्याने दर स्थिरावले. खानदेशात सध्या रावेर, यावल, मुक्ताईनगर, नंदुरबारमधील शहादा, तळोदा व अक्कलकुवा भागात फारशी केळी काढणीवर नाही. या भागात कांदेबाग केळीची लागवड अपदाने केली जाते. यामुळे या भागात केळीची आवक अधिकची नाही. केळीची आवक चोपडा तालुक्यात अधिक आहे. यापाठोपाठ धुळ्यातील शिरपूर, जळगाव आदी भागात कांदेबाग केळीची काढणी सुरू आहे. दर्जेदार केळीला चांगली मागणी आहे. 

उत्तर प्रदेश, पंजाब, काश्मिरात काही मोठे खरेदीदार केळीची पाठवणूक करीत आहेत. दर्जेदार केळीची बॉक्समध्ये पॅकिंग करून तिची पाठवणूक केली जात आहे. दर्जेदार केळीचे दर १२२० रुपये एवढे आहेत. पण कमी दर्जाच्या केळीची खरेदी ६०० ते ६५० रुपये प्रतिक्विंटल या दरात केली जात आहे. शेतकऱ्यांना याचा फटका बसत आहे. कारण जाहीर दरांच्या तुलनेत कमी दरात खरेदी केली जात आहे. याकडे जळगाव, चोपडा बाजार समितीचे सपशेल दुर्लक्ष आहे. 

मध्यंतरी जळगाव बाजार समितीने याबाबत काही खरेदीदारांना नोटिसा बजावल्या, परंतु पुढे काय कार्यवाही झाली, हे सांगितले जात नाही. यामुळे बाजार समित्यांची भूमिकादेखील संशयास्पद असल्याचे शेतकऱ्यांचे म्हणणे आहे. सणासुदीमध्ये केळी दर स्थिर राहतील, असा अंदाज सुरवातीला जाणकारांनी व्यक्त केला होता. पण व्यापाऱ्यांची लॉबी जुमानत नसल्याने दरांबाबत तक्रारी कायम आहेत.