दुष्काळात संवेदनशीलता बाळगा : डॉ. भारूड

सोलापूर : जिल्ह्यातील नऊ तालुक्‍यांमध्ये दुष्काळ जाहीर केला आहे. उर्वरित दोन तालुक्‍यांचा अहवालही सरकारला पाठविला आहे. त्यामुळे अधिकाऱ्यांनी दुष्काळाच्या बाबतीत संवेदनशीलता बाळगण्याच्या सूचना जिल्हा परिषदेचे मुख्य कार्यकारी अधिकारी डॉ. राजेंद्र भारुड यांनी दिल्या.

जिल्हा परिषद अधिकाऱ्यांच्या समन्वय समितीची बैठक यशवंतराव चव्हाण सभागृहात भारुड यांच्या अध्यक्षतेखाली झाली. दुष्काळात नेमक्‍या काय उपाययोजना कराव्यात याचीही त्यांनी माहिती दिली.

एखाद्या गावातून पाण्याबाबतचा अर्ज आल्यास त्याबाबत संवेदनशील होऊन पाहणी करून योग्य त्या उपाययोजना कराव्यात. त्या गावामध्ये पाणी देण्यासाठी काय करणे सोईस्कर आहे. त्या गावाची गरज काय आहे, याचीही पाहणी करावी. या काळात दुष्काळाच्या कामाला प्राधान्य देण्यासही त्यांनी सांगितले. दुष्काळ, महात्मा गांधी राष्ट्रीय ग्रामीण रोजगार हमी योजना यासह एकूण ४० मुद्द्यांवर या बैठकीत चर्चा झाली.

अक्कलकोट व दक्षिण सोलापूर तालुक्‍यातील अनेक गावांमध्ये पाणीटंचाई असल्याचे कृषी समितीचे सभापती मल्लिकार्जुन पाटील यांनी सांगितले होते. त्याबाबत डॉ. भारुड म्हणाले, ‘‘या दोन्ही तालुक्‍यांबाबत जिल्हाधिकाऱ्यांशी चर्चा करून त्या ठिकाणी टॅंकर सुरू करण्याची विनंती त्यांना करणार आहे. त्यामुळे त्या गावातील पाणीप्रश्‍नही सुटण्यास मदत होईल.``

‘दक्षिण'चे बीडीओ बेस्ट

दक्षिण सोलापूरचे गटविकास अधिकारी प्रशांतसिंह मरोड यांना उत्कृष्ट काम केल्याबद्दल ३१२ गुण मिळाले. त्यामुळे ऑक्‍टोबर महिन्याचा बेस्ट ‘बीडीओ''चा सन्मान मरोड यांना मिळाला. त्याखालोखाल बार्शीच्या गटविकास अधिकाऱ्यांना २९८, तर मंगळवेढा तालुक्‍याच्या गटविकास अधिकाऱ्यांना २७२ गुण मिळाले. त्यांचेही या वेळी अभिनंदन केले.