नांदेड, परभणी, हिंगोलीत पावसाने सोयाबीन, कपाशीचे नुकसान

नांदेड : नांदेड, परभणी, हिंगोली जिल्ह्यातील १२२ मंडळांमध्ये गुरुवारी (ता. २६) सकाळी आठपर्यंतच्या २४ तासांत हलका ते मध्यम पाऊस झाला. गेल्या २५ दिवसांमध्ये झालेल्या पावसामुळे विहिरी, तलाव, धरणातील पाणीपातळीत वाढ झाली. परंतु सततच्या पावसात भिजल्यामुळे काढणीस आलेल्या सोयाबीन, शेतामध्ये पाणी साचल्याने कपाशीच्या पिकाचे नुकसान झाले. पाऊस सुरू राहिल्यास नुकसानीची तीव्रता वाढण्याची शक्यता आहे.

नांदेड, परभणी, हिंगोली जिल्ह्यतील अनेक मंडळांमध्ये या महिन्यात सतत पाऊस सुरू आहे. त्यामुळे ओढे, नाले, नद्याकाठच्या तसेच सखल भागातील जमिनीतील निचरा झाला नाही. पिकांमध्ये पाणी साचून राहिले. सोयाबीनच्या पिकाचे नुकसान होत आहे. लवकर लागवड करण्यात आलेल्या कपाशीची बोंडे सडली आहेत. झाडे उमळून जात आहेत.

नांदेड जिल्ह्यातील ७९ मंडळांमध्ये हलका ते मध्यम पाऊस झाला. मुदखेड, भोकर, उमरी, नायगाव, बिलोली, देगलूर, मुखेड, कंधार तालुक्यातील अनेक मंडळांमध्ये चांगला पाऊस झाला. ओढे, नाले, नद्यांच्या, विहिरींच्या पाणीपातळीत लक्षणीय वाढ झाली आहे. परभणी जिल्ह्यातील आठ तालुक्यतील २४ मंडळांमध्ये हलका ते मध्यम पाऊस झाला. पालम, पूर्णा, मानवत, पाथरी तालुक्यात पाणी साचून राहिल्याने ओढे, नद्याकाठच्या पिकांचे नुकसान झाले.

या महिन्यात झालेल्या पावसामुळे अनेक मंडळातील विहिरी, तलाव, धरणांच्या पाणीपातळीत वाढ झाली. हिंगोली जिल्ह्यातील चार तालुक्यातील १९ मंडळामध्ये हलका ते मध्य्म पाऊस झाला. सेनगाव तालुक्यात चांगला पाऊस झाला.

मंडळनिहाय पाऊस (१० मिमीच्या पुढे)