चिखलीतील तेल्हारा धरणाच्या गेटदुरुस्तीस अखेर सुरवात

बुलडाणा ः पाटबंधारे विभागांतर्गत असलेल्या चिखली तालुक्यातील शेलगाव शिवारातील तेल्हारा धरणाच्या मुख्य गेटची दुरुस्ती करून पाणीटंचाईची समस्या सोडविण्यात यावी, अशी मागणी रयत क्रांती संघटनेसह शेतकऱ्यांनी वारंवार केली. मात्र, संबंधित विभागाकडून उडवाउडवीची उत्तरे मिळत असल्याने रयत क्रांती संघटनेचे जिल्हाध्यक्ष विनायक सरनाईक यांच्यासह शेतकऱ्यांनी सोमवारी (ता. १३) उपविभागीय अभियंत्याची भेट घेत गेटची दुरुस्ती करा; अन्यथा धरणामध्ये जलसमाधी आंदोलन छेडण्याचा इशारा देण्यात आला होता. या आंदोलनाची दखल घेत उपविभागीय अभियंत्यांनी गेटची पाहणी केली. दरम्यान, गेटच्या दुरुस्तीस सुरवातही करण्यात आली. शेलगाव शिवारातील तेल्हारा धरणाचे मुख्यव्दार हे गेल्या दहा ते पंधरा वर्षांपासून नादुरुस्त असल्याने यामधून दररोज हजारो लिटर पाण्याचा अपव्यय  होत होता. यामुळे धरणात पाणीसाठा शिल्लक राहत नव्हता. परिणामी, धरणाखालील शेलगाव, आन्वी, मुंगसरी, तेल्हारा, एकलारा व इतर गावांतील पाणीपुरवठा विहिरी कोरड्या पडत. नागरिकांना पाणीटंचाईचा सामना करावा लागत होता. याची दखल घेत रयत क्रांती संघटनेचे जिल्हाध्यक्ष विनायक सरनाईक यांच्यासह शेतकऱ्यांनी वारंवार ग्रामपंचायतीचे ठराव देऊन गेटची दुरुस्ती करण्याची मागणी जिल्हाधिकारी, कार्यकारी अभियंता, सिंचन विभागाकडे केली होती. दरम्यान, पाटबंधारे विभागाच्या उपविभागीय अभियंत्यांनी मेकॅनिक, संबंधित विभागाचे अधिकारी, कर्मचारी यांना घेऊन तेल्हारा धरणाच्या मुख्य गेटची पाहणी केली. त्यानंतर गेटच्या कामास सुरवात करण्यात आली आहे. या वेळी उपविभागीय अभियंता रोकडे, जलसंधारणचे सहायक अभियंता शिंदे, आर. एच. झुरावत, रयतचे जिल्हाध्यक्ष विनायक सरनाईक, उमेश चव्हाण, उपसरपंच नंदकिशोर अंभोरे, मुंगसरीचे माजी उपसरपंच शिवशंकर इंगळे, मदन अंभोरे, भागवत ठेंग यांच्यासह शेतकरी उपस्थित होते.