मुगाची हमीभावाने खरेदी सुरू करावी

परभणी ः मुगाची आधारभूत किंमत ७ हजार ५० रुपये असताना जिल्ह्यात कृषी उत्पन्न बाजार समित्यांमधील व्यापारी ४ हजार ते ५ हजार रुपये प्रतिक्विंटल दराने खरेदी करीत असल्याने शेतकऱ्यांचे आर्थिक नुकसान होत आहे. त्यामुळे जिल्ह्यात हमीभावाने मूग खरेदीसाठी केंद्रे सुरू करावेत, अशी मागणी राष्ट्रवादी काँग्रेसतर्फे जिल्हा प्रशासनाकडे करण्यात आली आहे.

यंदाच्या हंगामातील मुगाची आवक सुरू झाली आहे. आर्थिक अडचणी असलेले शेतकरी मूग बाजारात विक्रीसाठी आणत आहेत. केंद्र शासनाने मुगाची आधारभूत किंमत प्रतिक्विंटल ७ हजार ५० रुपये निश्चित केलेली आहे. परंतु, कृषी उत्पन्न बाजार समित्या अंतर्गतचे व्यापारी मुगाची ४ हजार रुपये ते ५ हजार रुपये प्रतिक्विंटल दराने खरेदी करत आहेत. 

त्याकडे सर्व संबंधित यंत्रणांचे दुलर्क्ष होत असल्याने शेतकऱ्यांचे फार मोठे आर्थिक नुकसान होत आहे. त्यामुळे हमीभावाने मुगाची खरेदी करण्यासाठी शासकीय खरेदी केंद्र सुरू करावेत. केंद्र सुरू होईपर्यंत शेतमाल तारण योजनेअंतर्गंत मुगासाठी तारण कर्ज देण्यात यावे. 

महाबीजला शेतमालाच्या आधारभूत किंमतीच्या ८० टक्के अग्रीम देण्यासाठी आदेशीत करावे, अशी मागणी राष्ट्रवादी काँग्रेसचे तालुकाध्यक्ष संतोष देशमुख, ओबीसी सेलचे जिल्हाध्यक्ष प्रा. किरण सोनटक्के, युवक जिल्हाध्यक्ष शांतीस्वरूप जाधव, किरण तळेकर, किसान सेलचे जिल्हाध्यक्ष सुरेंद्र रोडगे, मनोज राऊत, दीपक वारकरी, अशिष हरकळ, गोपाळ देशमुख, शेख सलमान, मोबीन कुरेशी यांनी जिल्हा प्रशासनाकडे केली आहे.