नाबार्डकडून शेतकरी कंपन्यांना सर्वतोपरी साह्य

सोलापूर ः शेतीमालाचे उत्पादन आणि मार्केटिंगसह प्रक्रियेमध्ये शेतकरी कंपन्यांना मोठी संधी आहे. या कामात नाबार्ड सर्वतोपरी साह्य द्यायला तयार आहे, असे नाबार्डचे जिल्हा व्यवस्थापक प्रदीप झिले यांनी सांगितले. 

नाबार्ड व यशस्विनी ॲग्रो प्रोड्यूसर कंपनी अंतर्गत सोलापूर जिल्ह्यामध्ये तीन शेतकरी उत्पादक कंपन्याची स्थापना झाली. त्या तिन्ही कंपनीचे (पी.एम.आय.सी) बैठक नुकतीच झाली. त्यात श्री. झिले बोलत होते. 

कृषी विज्ञान केंद्राचे कार्यक्रम समन्वयक डॉ. लालासाहेब तांबडे, जिल्हा मध्यवर्ती बॅंकेचे व्यवस्थापक किसन मोटे, आत्माचे तंत्रज्ञान व्यवस्थापक विक्रम फुटाणे या वेळी उपस्थित होते. या वेळी नाबार्ड व यशस्विनी ॲग्रो प्रोड्यूसर कंपनीतंर्गत स्थापन झालेल्या श्री. गेनसिद्ध, शिवराई व फार्मर डिलाईट शेतकरी उत्पादक कंपनीचे प्रतिनिधी उपस्थित होते. 

श्री. झिले यांनी सध्याच्या शेती क्षेत्रातील बदल आणि शेतकरी कंपन्यांना आलेले महत्त्व, यावर माहिती दिली. तसेच स्थापन झालेल्या कंपनीच्या तीन महिन्यांच्या कामाचा आढावा घेतला. तसेच कंपन्यांचे पुढील नियोजन, नाबार्डकडून कंपनीस मिळणाऱ्या योजना व कौशल्याचे प्रशिक्षण, एक्‍सपोजर व्हिजिट व विविध प्रशिक्षण याविषयी मार्गदर्शन केले. 

डॉ. तांबडे यांनी शेतकरी उत्पादक कंपन्यांनी व्यवसाय निवडताना कोणकोणत्या बाबी लक्षात घ्यायला हव्यात, त्यातील संभाव्य धोके, मार्केटमध्ये आपला प्रॉडक्‍ट टिकून राहण्यासाठी कोणकोणत्या बाबी लक्षात घ्यायला पाहिजेत, याबाबत मार्गदर्शन केले. 

श्री. मोटे यांनी शेतकरी उत्पादक कंपन्यांना बॅंकिंग क्षेत्राविषयी मार्गदर्शन केले आणि आर्थिक व्यवहार कशा पद्धतीने करायला पाहिजे, हे सांगितले. श्री. फुटाणे यांनी आत्माच्या योजनांविषयी माहिती दिली. यशस्विनी ॲग्रो कंपनीच्या अध्यक्षा अनिता माळगे यांनी सूत्रसंचालन केले.