‘तौत्के’ चक्रीवादळाच्या पार्श्वभूमीवर काळजी घ्या :

नाशिक : ‘‘प्रादेशिक हवामान विभाग, मुंबई यांच्याकडून प्राप्त माहितीनुसार १६  व १७ मे रोजी काही ठिकाणी मुसळधार ते अति मुसळधार पावसाची शक्यता वर्तविण्यात आली आहे. त्या अनुषंगाने नाशिक जिल्हा व गुजरात राज्याच्या तटवर्ती भागात याचा परिणाम होण्याची शक्यता नाकारता येत नाही. त्यामुळे नागरिकांनी आवश्यक ती दक्षता घेणे आवश्यक आहे’’, असे आवाहन जिल्हाधिकारी सूरज मांढरे यांनी केले आहे.

१५ मे रोजी अरबी समुद्रातील ‘तौत्के’ या चक्रीवादळाच्या प्रभावाने महाराष्ट्र व गोवा किनार पट्टीवर ४० ते ६० किमी प्रति तास वेगाने वारे वाहतील. १६ मे रोजी या वादळाच्या प्रभावाने महाराष्ट्र व गोवा किनारपट्टीवर ५० ते ७० किमी प्रतितास, तर १७ मे रोजी या वादळाच्या प्रभावाने ५० ते ६० किमी प्रतितास वेगाने वारे वाहतील, अशी शक्यता हवामान विभागाने वर्तविली आहे.

चक्रीवादळ कालावधीत वाहणारा सोसाट्याचा वारा व मुसळधार पर्जन्यवृष्टी लक्षात घेऊन नागरिकांनी सावधगिरी बाळगावी. आपत्कालीन परिस्थितीमध्ये मदतीसाठी जिल्हा नियंत्रण कक्ष:०२५३-२३१७१५१ किंवा टोल फ्री क्रमांक १०७७ ला संपर्क करावा. हवामानाची माहिती भारतीय हवामान खात्याच्या www.imd.gov.in या संकेतस्थळावरून घ्यावी. कुठल्याही अफवांवर विश्वास ठेवू नका व अफवा पसरवू नका. अतिवृष्टीच्या कालावधीत आपण जागरूक राहावे व प्रशासनास सहकार्य करावे, असे आवाहन करण्यात आले. 

शेतीमाल सुरक्षित स्थळी ठेवा 

वाहणाऱ्या वाऱ्यामुळे किंवा तुरळक पावसामुळे शेत मालाचे नुकसान होऊ नये, या साठी शेतकऱ्यांनी विशेष काळजी घ्यावी. शेतीमाल सुरक्षित स्थळी ठेवावा. पाळीव प्राण्यांसाठी व पक्ष्यांसाठी तयार केलेल्या शेडची दुरुस्ती व वाऱ्यामुळे शेडचे पत्रे उडू नये, यासाठी दक्षता घ्यावी. आपत्कालीन परिस्थिती उद्‌भवल्यास त्या बाबत जागरूक राहावे व योग्य ती दक्षता घ्यावी, असे जिल्हा प्रशासनाने कळविले आहे.