भंडारा ः ‘कोरोना’ विषाणूचा प्रादुर्भाव रोखण्यासाठी लॉकडाऊनच्या पार्श्‍वभूमीवर पीककर्ज परताव्यास मुदतवाढ देण्यात आली. त्यामुळे ३१ मार्चपर्यंत पीककर्जाची परतफेड करणाऱ्या शेतकऱ्यांना बुधवार (ता. १५) पासून नवीन पीककर्ज दिले जाणार असल्याची माहिती जिल्हा बॅंकेचे अध्यक्ष सुनील फुंडे यांनी दिली.
‘कोरोना’विषाणूचा प्रादुर्भाव रोखण्यासाठी सर्वदूर लॉकडाऊन घोषित केले आहे. अशा स्थितीतही अनेक शेतकऱ्यांनी ३१ मार्चपर्यंत कर्जाची परतफेड करण्यासाठी पुढाकार घेतला. आता कर्ज परतफेडीस मुदतवाढ मिळाली आहे. व्याज सवलत योजनेचा फायदा त्या अंतर्गंत शेतकऱ्यांना मिळणार आहे. असे असले तरी ३१ मार्चपर्यंत कर्जाची परतफेड करणाऱ्या शेतकऱ्यांना नवीन पीककर्ज देण्यात येणार आहे.
जिल्हा मध्यवर्ती बॅंकेच्या विविध सहकारी संस्थांनी ३१ मार्चपर्यंतच्या जमाखर्चाचे ताळेबंद हिशेब शुक्रवार (ता. १०) पर्यंत बॅंकेच्या मुख्यालयी पाठविण्याचे निर्देश देण्यात आले आहेत. त्याआधारे शेतकऱ्यांना तातडीने येत्या खरीप हंगामासाठी पीककर्ज उपलब्ध करून देण्यात येणार आहे. उशिराने ताळेबंद पाठविल्यास त्या संस्थांना रक्‍कमेचे वाटप उशिरा होईल.
शेतकऱ्यांना अडचणींचा सामना यामुळे करावा लागेल. त्याची दखल घेत संस्थाध्यक्ष सचिवांनी वेळेत आपला ताळेबंद सादर करावा, असेही त्यांनी सांगितले. लॉकडाऊनमुळे शेतकऱ्यांसमोरील अडचणी वाढल्या आहेत. अशावेळी दिलासा देण्याकरिता बॅंकेने पीककर्ज वाटपाचे नियोजन केले आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.