पुणे : कोरेगाव भिमा व सणसवाडी (ता. शिरूर) येथे एक जानेवारीला झालेल्या दंगल तसेच वढू बुद्रुक येथे पोलिस अधिकाऱ्यांची गाडी फोडल्या प्रकरणी आता पोलीसांनी अटकसत्र सुरु केले असून, या प्रकरणी पोलीसांकडून तीन अल्पवयीन आरोपींसह अकरा जणांना अटक करण्यात आल्याची माहीती शिक्रापूर पोलिसांनी दिली. कोरेगाव भिमा (ता. शिरूर) येथील दंगलीच्या गुन्ह्यामध्ये तसेच वढू बुद्रुक येथे पोलिस अधिकाऱ्यांची गाडी फोडल्याप्रकरणी अटक करण्यात आलेल्या आरोपींमध्ये दोन्ही गटाचे आरोपी असुन त्यांना कोरेगाव भीमा, सणसवाडी व कोंढापुरी येथुन अटक करण्यात आली आहे. पोलिस सुत्रांनी दिलेल्या माहीतीनुसार दंगल माजवणे, जाळपोळ, दगडफेक करणे तसेच सार्वजनिक व शासकीय मालमत्तेचे नुकसान करणे, पोलीसांवर हल्ला करणे आदी कलमांतर्गत त्यांना अटक करण्यात आली आहे. स्थानिक गुन्हे अन्वेशन शाखेचे पोलिसांनी आरोपींची पडताळणी व खात्री करण्याचे काम सुरु केले आहे.
सध्या दंगल झालेल्या घटनास्थळावरुन ताब्यात घेतलेले सीसीटीव्ही फुटेज तपासुन आरोपींची ओळख पटविण्यात येत आहे. अप्पर पोलिस अधिक्षक डॉ. संदीप पखाले यांच्या मार्गदर्शनाखाली पोलिसांनी कारवाईस सुरुवात केली आहे. पोलिसांचे एक स्वतंत्र पथक दंगल करणाऱ्या आरोपींबाबत माहीती घेत आहे. नेमण्यात आलेले हे पथक मिळालेले सर्व सीसीटीव्ही फुटेज व पुरावे तपासत आहे. कोरेगाव भीमातील या गुन्ह्याच्या तपासासाठी सुमारे चारशे पोलिसांचे बळ तैनात ठेवण्यात आलेले आहे. कोणत्याही भागामध्ये आरोपींच्या अटकेबाबत तणावाचा प्रसंग उभा राहु नये, यासाठी पोलिसांनी वतीने सर्व आरोपींच्या नावाबाबत गुप्तता बाळगली असून आरोपींची नावे गुपित ठेवण्यात आलेली असल्याचे देखील पोलिसांनी सांगितले आहे. अटक करण्यात आलेल्या आरोपींना आज न्यायालयात हजर केले असता न्यायालयाने वढू बुद्रुक येथे पोलिस अधिकाऱ्यांची गाडी फोडल्या प्रकरणी अटक केलेल्या आरोपींना दहा जानेवारीपर्यंत त्यांना पोलीस कोठडीत ठेवण्याचे तर कोरेगाव भिमा दंगल प्रकरणी अटक केलेल्या दोन आरोपींना बारा जानेवारीपर्यंत पोलिस कोठडीत ठेवण्याचे तसेच अल्पवयीन असलेल्या दोन आरोपींना जामिनावर मुक्त करण्याचे आदेश दिले आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.